Shtetet e Bashkuara kanë akuzuar Iranin për shkelje të “premtimeve” pasi anija transportuese Adrian Darya 1 supozohet se ka dërguar naftë në Siri, pavarësisht deklaratave se do të ndodhë e kundërta, ka thënë Departamenti amerikan i Shtetit.
E emëruar më parë, Grace 1, kjo anije është mbajtur për gjashtë muaj në ujërat e territorit britanik në Ngushticën e Gjibraltarit, derisa autoritetet kanë pranuar garanci me shkrim nga Irani se ajo nuk do të dërgojë anijen në Siri sepse përbën shkelje të sanksioneve të Bashkimit Evropian.
“Kjo hyn në listën e gënjeshtrave të bëra nga regjimi iranian për 40 vjet. Mashtrimet dhe shkeljet e premtimeve nuk janë bërë vetëm ndaj komunitetit ndërkombëtar, mirëpo edhe ndaj popullit iranian gjithashtu. Pavarësisht premtimeve revolucionare për një shoqëri më të mirë, banditët në Teheran kanë shtypur vazhdimisht gratë, minoritetet dhe mbrojtësit e të drejtave të njeriut.”, ka thënë zëdhënësja e Departamentit të Shtetit, Morgan Ortagus para gazetarëve në Uashington.
Më 9 shtator, ministria e Jashtme e Iranit ka thënë se anija, Adrian Darya 1 ka dërguar naftë të papërpunuar në një vendndodhje të pazbuluar.
Shtetet e Bashkuara janë tërhequr një vit më parë nga marrëveshja bërthamore që Teherani ka nënshkruar me fuqitë botërore më 2015 dhe nga ajo kohë ka rikthyer sanksionet ndaj Iranit duke i goditur sektorin bankar dhe atë të naftës./Opinion.al
