Rrjeti elektrik i fshatit Shënpjetër në Fier është djegur. Disa banorë të zonës i kanë vënë flakën mbetjeve të arave të korrura nga gruri por zjarri ka dalë jashtë kontrollit dhe ka djegur të gjithë rrjetin elektrik.
Në vendngjarje kanë shkuar menjëherë efektivë të policisë së Fierit ndërkohë pritet mbërritja e zjarrfikëseve. Sipas policisë është njoftuar gjithashtu OSSHE për të bërë stakimin e energjisë për shkak se zjarri ka shkrirë kabllot elektrike.
Zjarrvënia me qëllim vjen pas disa ditësh kur në Shqipëri ka patur probleme në disa zona me përhapjen e vatrave të zjarrit të cilat kanë qenë të vështira për tu neutralizuar si pasojë e motit dhe terrenit. Ende për këtë ngjarje nuk ka të ndaluar nga policia megjithëse dëmi i shkaktuar është i konsiderueshëm. /Opinion.al
