Kryesore

Tabaku: Si po e fshehin skandalin e borxhit të PPP-ve, 2 shembuj konkretë


               Publikuar në : 12:05 - 25/08/19 |
Al Do

Kontratat e Partneriteteve Publik-Privat janë borxh publik dhe si të tilla po sjellin rritjen e taksave për bizneset dhe qytetarët, shkruan ish-deputetja e PD, Jorida Tabaku.

Ajo argumenton se PPP-të përpos problematikave të shumta që kanë në vetvete si skema korruptive paraqesin gjithashtu një rrezik të paprecedentë për ekonominë që qeveria e fsheh.

“Sot këto kontrata arrijmë vlerën e 2,2 mld euro” shkruan Tabaku dhe kjo do të thotë që borxhi publik është 83% e Prodhimit të Brendshëm Bruto. Megjithatë qeveria e ka mohuar vazhdimisht faktin që PPP-të janë borxh publik dhe faktin se ato përbëjnë një rrezik fiskal.

Këtyre pretendimeve ish-deputetja e PD i përgjigjet duke përmendur dy standarde ndërkombëtare kontabiliteti dhe dy shembuj konkretë të PPP-ve të dhëna nga qeveria.

“Në bazë të standardeve të Kontabilitetit ESA 2010 buxheti duhet të shoqërohet me një Footnote për detyrimet që do të ketë qeveria ndaj koncesionarit. Në standardin e IPSAS 32, koncesionet duhet të njihen si borxh në momentin që lidhet kontrata koncesionare, duke reflektuar kështu detyrimin e qeverisë,këto dy kritere dhe standarde të kontabilitetit duhet të detyrojnë Ministrinë e Ekonomisë dhe Financave që të përllogarisë PPP-të si Borxh Publik. Kjo do të sillte kapërcimin e borxhit publik në 83% të PBB-së” argumenton Tabaku.

Ajo shton se raporti i FMN, KE, DASH dhe një studim i Intelligence Unit kritikojnë kontratat koncesionare në Shqipëri dhe tërheqin vëmendjen ndaj rreziqeve fiskale që paraqesin PPP-të.

“Shembullin më të mirë se pse këto kontrata janë borxh janë vetë dokumentet e paraqitura në këto kontrata. Le të shohim dy raste që janë diskutuar gjatë: kontrata e rrugës Milot-Balldren dhe ajo e shkollave në Tiranë. Në të dyja kontratat vetë qeveria shprehimisht thotë se biznesi konsiderohet që po i jep borxh shtetit dhe për këte risk do të angazhohet qeveria që t’u ofrojë mbulimin e riskut. Në rastin e shkollave me PPP që ndërtohen në Tiranë kosto e tyre është 54 mln euro por qeveria paguan 70 mln euro pasi I mbulon riskun e dështimit biznesit. E njëjta logjikë zbatohet edhe në kontratën e rrugës Milot-Balldren , ku jashtë çdo arsye ekonomike shteti I del garant riskut të biznesit duke I paguar 296 mln euro për një projekt me kosto 100 mln euro!” vazhdon Tabaku.

Ky sipas saj është një skandal të cilin Ministria e Ekonomisë dhe Financave përpiqet të fshehë pasi nëse PPP-të do të konsideroheshin si borxh publik atëhreë “fabula e PPP-ve që nuk paguhen nga taksat e shqiptarëve do të bie një herë e mirë”. /Opinion.al

Pas