Kryetari i partisë Lëvizja për Zhvillim Kombëtar, Dashamir Shehi, mendon se në datën 13 tetor nuk mund të kryhen zgjedhje të trefishta siç ka propozuar Presidenti Meta.
Në një intervistë për televizionin “Klan”, Shehi është shprehur se në 13 tetor është e përshtatshme të zhvillohen vetëm zgjedhjet lokale.
“Zgjedhje administrative edhe mund të bëhen. Përsa i përket zgjedhjeve politike, zgjedhjet për president që duhet ndryshuar kushtetuta, unë gjykoj se data 13 tetor është e papërshtatshme” u shpreh ish-deputeti Shehi.
Sa i përket hyrjes në zgjedhje, aleati i Bashës theksoi se opozita nuk mund të hyjë në zgjedhje me Edi Ramën kryeministër pasi do të tradhtonte kauzën e saj.
“Duhen minimalisht 6-7 muaj deri në një vit që të fillojë qeveria, të quhet tranzitore. Ne i kemi premtuar shqiptarëve zgjedhje me një sistem të ri zgjedhor. Me një kushtetutë të re e cila do ti balancojë institucionet. Me një klimë të re politike ku zgjedhje s’do ti bëjnë më banditët e Edi Ramës. I kemi premtuar praktikisht zgjedhje pa Edi Ramën. Deri më sot nuk është se kemi ndonjë avancim përveç se opinionit popullor. Ndryshe i bie që të tradhtojmë këtë ide të madhe që ngritëm” tha Shehi.
Si zgjidhje të kësaj krize, kreu i LZHK sheh vetëm një rrugë, atë të një marrëveshjeje politike mes palëve duke patur ndërkombëtarët si garant.
“Rama, Basha me ndërkombëtarët sigurisht se ato duhet të jenë garant të kësaj pune. Ne dimë fort mirë se e gjitha kjo kalon nëpërmjet një marrëveshje të madhe politike. Po që të bëjmë zgjedhje sa për të larë gojën, unë gjykoj se nuk ka vlerë” tha ai.
Shehi është në një mendim me kryetarin e opozitës edhe përsa i përket njohjes së rezultatit të procesit të 30 qershorit dhe lirimit të zyrave nga kryebashkiakët e opozitës.
“ Ai (Rama) me pushkë, me policë, me dhunë me kriminelë mund të bëjë çdo gjë. Ne presim që ti jepet një interpretim definitiv votimit nga OSBE/ODHIR, a i njohin a s’i njohin. Ne duhet të presim a do bëhet sipas ligjeve e bekuara Gjykata Kushtetuese që të vendosë a është i vlefshëm ky dekret” përfundoi Shehi intervistën. /Opinion.al
