Në takimin e G20 në Osaka po zhvillohen bisedime për disa nga çështjet më të rëndësishme nga pikëpamja botërore. Një nga ato padyshim është e ardhmja e Bashkimit Europian tani që në pozicionet kryesore drejtuese do të emërohen figura të reja. Komisioni Europian, Parlamenti dhe Banka Qendrore Europiane janë institucione, vendimmarrja e të cilave ndikon në jetën e milionave qytetarë të BE por edhe më gjerë.
Në lidhje me këtë çështje prestigjiozja britanike Financial Times ka publikuar një artikull lidhur pikërisht me bisedimet dhe propozimet që po kryhen mes liderëve botërorë.
Ajo shkruan se socialisti holandez, Frans Timmermans ka më shumë mundësi të jetë në krye të Komisionit Europian. Ndërsa konservatori gjerman, Manfred Weber do të zërë postin e presidentit të Parlamentit Europian. Ky është propozimi i fundit që është hedhur gjatë bisedimeve në Osaka.
Kujtojmë se Weber është kandidatura e mbështetur nga kancelarja Merkel për postin e kryetarit të Komisionit, por kjo gjë ka ndeshur kundërshtinë e Presidentit Macron i cili kërkon një figurë më të njohur për kreun e ekzekutivit europian.
Përsa i përket Bankës Qëndrore Europiane, emri që duket se ka më shumë gjasa të zgjidhet është francezi Francois Villeroy de Galhau.
Kjo është zgjidhja mbi të cilën po punohet për të nxjerrë nga ngërçi BE-në për pozicionet kyçe, shkruan “Financial Times”.
Megjithatë në artikull thuhet se sado mbështetje që mund të gjejë ky propozim në G20, ai mund të rrëzohet nëse vendet e grupit të Vishegradit do ta kundërshtojnë atë. /Opinion.al
