Donald Trump ka hedhur poshtë një kërkesë të Kombeve të Bashkuara për FBI-në për të hetuar vrasjen e gazetarit disident Jamal Khashoggi, duke sugjeruar se kjo do të rrezikonte shitjet amerikane të armëve në Arabinë Saudite.
Një raport mbi vrasjen e Khashoggi, i publikuar javën e kaluar nga raportuesi special i OKB-së, tha se SHBA duhet të hapin një hetim të FBI dhe “të ndjekin hetimet penale brenda Shteteve të Bashkuara”.
Në një intervistë për rrjetin NBC Trump tha se ai nuk do të pranonte që FBI të hetonte këtë ngjarje pasi “shumë është hetuar deri tani”
I pyetur se kush e kishte hetuar, presidenti u përgjigj: “Të gjithë. Dua të them që kam parë shumë raporte të ndryshme”
Presidenti përmendi një shifër të ekzagjeruar në lidhje me shpenzimet e Arabisë Saudite për armët amerikane dhe madje është kritikuar disa herë për këtë gjë pasi faktet zyrtare nuk përputhen me deklaratat e tij.
“Unë them vetëm se ata shpenzojnë 400 deri në 450 miliard dollarë “ tha Trump.
Në fakt, Arabia Saudite vitin e kaluar nënshkroi “letra oferte dhe pranimi” për 14.5 miliard dollarë në blerjet ushtarake nga SHBA.
Ai sugjeroi me tej se nëse Arabia Saudite nuk do të blinte armë nga SHBA atëherë do ti drejtohej Rusisë ose Kinës. Megjithatë senati bllokoi administratën e Trump që ti shiste armë sauditëve. Për këtë gje Trump paralajmëroi vendosjen e vetos për të cuar përpara projektin e shitjeve.
Khashoggi, 59 vjeç, u vra kur hyri në konsullatën saudite në Stamboll në tetor të vitit të kaluar. Raportuesi i posaçëm i OKB-së fajësoi qeverinë saudite për vrasjen dhe tha se kishte prova të besueshme se përgjegjësit ishin Princi i Kurorës Mohammed bin Salman dhe zyrtarë të tjerë të lartë. /Opinion.al
