Kabineti i Komisionerit për Zgjerim në Bashkimin Evropian, Johannes Hahn po e mendon seriozisht mundësinë e shtyrjes së publikimit të raportit të zgjerimit të BE-së. Kështu kanë thënë burimet nga komisioni Europian për Radion Evropa e Lirë.
Kjo pasiguri brenda institucioneve të BE-së, vjen si rezultat i presionit nga disa vende anëtare, të cilat nuk janë të gatshme të diskutojnë çështjen e zgjerimit në takimin e muajit qershor.
Publikimi i pakos së zgjerimit është planifikuar të ndodhë më 29 maj dhe një diskutim në nivel të ministrave të mbahet në qershor.
Megjithatë, disa vende anëtare nuk janë gati të debatojnë, pasi duhet të vendosin për rekomandimin e Komisionit Europian për fillimin e negociatave të pranimit me Maqedoninë e Veriut dhe Shqipërinë.
Kjo çështje, në disa shtete anëtare të BE-së, kërkon përputhje me procedurat e brendshme, përfshirë miratimin nga ana e parlamenteve kombëtare.
Meqenëse është një periudhë shumë e shkurtër midis 29 majit dhe 18 qershorit, kur do të mbahet takimi ministror, shtetet anëtare nuk janë në gjendje të deklarohen mundësinë e hapjes së negociatave të pranimit.
Zyrtarë të kabinetit të komisionerit për Zgjerim, thonë se ka mundësi të shtyrjes së publikimit raportit.
Situata pritet të qartësohet të hënën, kur do të takohen shefat e kabinetit në Komisionin Evropian, i cili përfundimisht do të vendosë nëse do të mbajë edhe më tej dokumentin apo do të japë dritën e gjelbër për publikim të mërkurën. Raporti i zgjerimit nëse publikohet, vjen tre ditë pas zgjedhjeve evropiane./ Opinion.al
