“Mua më përjashtoni nga Europa nëse e kanë kusht këtë gjë!”, Ka qenë kjo deklarata e deputetit Myslim Murrizi i ftuar në emisionin “Provokacija” nga Mustafa Nano, në lidhje me homoseksualët, pikërisht në ditën kundër Homofobisë.
Murrizi, i cili tani ka marrë dhe postin e nën kryetarit të Kuvendit, është shprehur se nuk është racist ose kundër këtij komuniteti. Ai nuk e konsideron as sëmundje, por nuk e sheh këtë deviacion si një ndër arsyet për të qenë perëndimor.
Myslim Murrizi: Për tipin që kam unë nga natyra dhe nuk është se më lidh gjë me të majtën, nga pjesa e djathtë siç e konceptoj unë të djathtën, Zoti, familja dhe prona, siç e konceptoj unë, nuk jam racist, por jam tradicional dhe ky është ai debati që kemi pasur sëbashku. Nuk është se jam kundër atyre. Unë nuk e quaj as arritje të tyre, as sëmundje, por nuk e shoh që kolona kryesore për të qenë në perëndim është ai deviacion. Ky ka qenë në një farë mënyre përplasja në distancë me ju.
Mustafa Nano: As unë nuk e konsideroj arritje të jesh gay. Të jesh gay është gjendje e caktuar, nuk është as meritë. Thelbi perëndimit për mua, është që njerëzit sido që të jenë pavarësisht nga orientimi i tyre janë njësoj, duhet të respektohen.
Myslim Murrizi: Shumë mirë, çdokush është në të drejtën e tij. Unë edhe në një batutë pata disa ditësh kur iu ktheva Ramës thashë që “mua më përjashtoni nga Europa nëse e kanë kusht këtë gjë, unë nuk vij në Europë”. Burimi: Abc News
