Prokuroria e Krimeve të Rënda ka marrë në dorë dosjen për ekzekutimin e avokatit 50-vjeçar Ravik Gurra. Ky i fundit u qëllua me plumb në kokë nga atentatori me një pistoletë me silenciator, teksa ishte ulur mbrëmjen e së premtes në një lokal në qendër të Elbasanit.
Autori u largua me një automjet Mercedez Benz me targë AA 934 HU, e cila u gjet e djegur nga policia në Bradashesh, pak pas krimit të rëndë. Makina ishte vjedhur në Fushë-Krujë para tre muajve, dhe pronari i mjetit e ka denoncuar në polici. Vrasja e 50-vjeçarit po hetohet nga Prokuroria për Krime të Rënda në Tiranë për akuzën e “Vrasjes së funksionarëve publikë”.
Pista kryesore e hetimit është ajo që lidhet me punën e 50-vjeçarit, pasi ka mbrojtur në Gjykatë disa nga anëtarët e fisit Çapja si dhe Emiljano Shullazin. Ndërkohë gazetari që mbulon çështjet e kronikës, në një postim në rrjetet sociale ka treguar takimin e fundit me avokatin.
“Herën e fundit e takova të premten e kaluar në seancën për Shullazit dhe grupin në Apelin e Krimeve. Po i tregoja qe kisha ndërruar vendin e punës, por jo pozicionin, duke i bashkangjitur me të qeshur frazën e huazuar nga një spot publicitar “ndërrova ngjyrën, por jo numrin”.
“Je i martum, tha Raviku, se nryshe mund ta ndërroje dhe numrin”.
Avokati elbasanas në vijimësi shprehte pakënaqësi për mënyrën si funksiononte drejtësia në Shqipëri, duke sjellë sakaq eksperiencën e huaj. Me trishtoi lajmi për vrasjen e tij.
Gjeja e parë që me feksi nder mend ishte një bisedë me te 2-3 vjet me parë, kur po i kërkoja mendim për një 60 e ca vjeçar, ish-funksionar publik, që shfaqej studiove duke mbajtur qëndrime qe s’i shkonin për shtat. Une, tha avokat Raviku, kur te jem 65 vjeç dua te baj vetëm nji gja: T’lexoj Shekspirin dhe të ushqej pulat tek shtëpia në fshat (me duket se atëkohë e kishte nisur ndërtimin e saj ne rrethinat e Elbasanit). Atë jetë du me ba. S’të lanë të bëhesh 65 vjeç avokat…”/Opinion.al
