Në mungesë të Inspektoratit të Lartë të Drejtësisë, procedura e hetimit disiplinor për prokurorët është e parealizuar. E për këtë Prokurorja e Përgjithshme e Përkohshme, Arta Marku i ka bërë një thirrje Kuvendit duke i kërkuar të ndërhyjë.
“Prokurori i Përgjithshëm nuk ka kompetencë për ta çuar deri në fund këtë proces. Dispozita kalimtare nuk i ka dhënë të drejtën kryeprokurorit për të vazhduar procedimin disiplinor. Ndaj i bëj thirrje Kuvendit që të miratojë ndryshimet e nevojshme dhe të plotësojë boshllëkun ligjor për të vënë në lëvizje mekanizmat kontrollues”, tha Marku, gjatë një mbledhjeje në Durrës për analizën e Prokurorisë në rang Apeli, duke përfshirë këtu edhe institucionet hetimore të Elbasanit dhe Kavajës
Sa i përket kriminalitetit në këto qytetet, zonja Marku ka theksuar është në nivelet më të larta.
“Këto prokurori, në Durrës, Elbasan e Kavajë, bartin peshën më të madhe të kriminalitetit. Edhe pse ka arritje, ka edhe probleme, pasi ka shumë ankesa të qytetarëve në media. Ndërhyrja e Prokurorisë së Përgjithshme për të adresuar shumë komente e fyerje degraduese duhet kuptuar”./Opinion.al
