Si çdo protestë kryeministri Edi Rama nuk ka qëndruar në Tiranë, por ka vazhduar aktivitet e tij në rrethe. Shefi i qeverisë ka qenë që prej ditës së djeshme në Berat.
Në një takim me operatorët turistikë të qarkut, Rama nuk la pa komentuar protestën, duke theksuar se protestuesit janë rrogëtarë të thirrur nga opozita për të bërë rrëmujë politike.
“Qeveria nuk preket se nuk është një mur që i bie dhe e shemb. Është një mandat besimi i shumicës së popullit dhe ndryshon vetëm kur i vjen radha popullit që të gjykojë nëse duhet ta rinovojë atë mandat besimi apo t’ia kalojë dikujt tjetër. Ndërkohë preket ekonomia e kujtdo dhe ata që shkojnë në protestat e organizuara dhe të orkestruara për t’u materializuar në dhunë, një pjesë janë rrogëtarë, të cilët marrin një rrogë si punonjës të administratave lokale politike dhe të tejpolitizuara dhe që bëjnë detyrën e tyre ndaj partisë, që marrin autobusin dhe vijnë.
Janë si të thuash, punëtorë të ndërmarrjes parti që i thërret në një rrëmujë politike dhe mbase për ta llogaria sado dritëshkurtër është më e thjeshtë, marrim rrogën, bëjmë këtë punë. Për këdo tjetër që jeton me punë është të shkojë për t’u rënë këmbëve të veta, të pengojë veten. Rënia e numrit të turistëve për shkak të frikës që krijohet nga imazhet mizerabël që përçojnë jashtë kufijve këto sherre dhe rrëmuja do të thotë rënie e parasë që vijnë në këtë vend. Turistët nuk janë statistika, janë xhepa të mbushur që vijnë për tu zbrazur këtu. Këto lloj bllokimesh dhe shfaqjesh në raport me sistemin që kemi zgjedhur nuk është se na e bëjnë më të lehtë me partnerët tanë europianë procesin që duhet të kurorëzojmë me hapjen e negociatave”, tha Rama. /Opinion.al
