Tetë muaj pas takimit të parë në Singapor, Donald Trump dhe Kim Jong-un kanë nisur takimin e dytë në Hanoi të Vietnamit. Dy liderët pritet të diskutojnë denuklearizimin e gadishullit Korean si edhe një sërë çështjesh për të cilat kanë rënë dakord gjatë takimit të parë, por për të cilat është bërë pak progres.
Trump mbërriti në Hanoi me avionin “Air Force One” dhe përpara takimit me diktatorin korean, zhvilloi takime me kryeministrin vietnamez dhe politikanë të tjerë. Trump shkroi në Twitter se Vietnami po përparon si pak shtete në botë dhe Koreja e Veriut mund të ndjekë të njëjtën rrugë nëse heq dorë nga armët bërthamore.
Nga ana tjetër, Kim Jong-un mbërriti në Vietnam pas 3 ditësh udhëtim me tren dhe me makinë në rrugë tokësore, duke përshkuar më shumë se 4000 kilometra.
Në përfundim të këtij takimi, pritet të arrihet një marrëveshje për denuklearizimin e Koresë së Veriut. Gjithsesi, para takimit të sotëm, Donald Trump tha se nuk po kërkonte me forcë çarmatimin e Koresë së Veriut, por do të ishte i lumtur nëse nuk do të bëheshin më teste nukleare./Opinion.al
