Çmimi i ujit mund të rritet. Enti Rregullator i Ujit në raportin për vitin 2018 vlerëson se ka ende hapësira që shqiptarët të përballojnë rritjen e tarifave. Këtë rekomandim ky institucion e jep duke u bazuar në të dhënat e INSTAT.
“ERRU përdor si kriter për përballueshmërinë e pagesës së faturës së shërbimeve UK, në nivelin prej 5% të të ardhurave (shpenzimeve) mesatare mujore të një njësie ekonomike familjare, informacion që e përllogarit dhe e publikon INSTAT në “Anketën e Buxhetit të familjes viti 2017”, për të gjithë qarqet e Republikës së Shqipërisë. Këto vlera tregojnë se ka ende hapësirë në drejtim të aftësisë paguese për të përballuar rritjen e tarifave”, theksohet në raport. Megjithëse rekomandohet rritja e çmimit, Enti Rregullator i Ujit thotë se shqiptarëve iu sigurohet furnizimi me ujë vetëm 11 orë në ditë.
Po ashtu nga raporti del se për vitin 2018, të ardhurat totale të realizuara gjatë vitit 2018 janë në shumën 80,870,363 lekë, prej të cilave 79,807,426 lekë janë nga pagesat rregullatore, 680,000 lekë nga pagesat për licencimet dhe 382,937 lekë të ardhura të tjera. Detyrimi i prapambetur i shoqërive UK (Ujësjellës Kanalizime) në fund të vitit 2018 rezulton të jetë në shumën 55,278,290 lekë. /G.F Opinion.al
