100 pasaporta të reja që ishin dërguar nga Ministria jonë e Jashtme, me autobus, për emigrantët shqiptarë atje kanë humbur në Greqi gjatë transportit. Pasaportat fillimisht janë bllokuar nga dogana greke në Kakavijë për shkak se transporti ishte në shkelje të procedurave. Në një deklaratë për mediat, Ministria për Evropën dhe Punët e Jashtme, thotë se me datë 13 shkurt, pasaportat e prodhuara nga kompania ALEAT po transportoheshin drejt Greqisë të ambalazhuara jo në përputhje me praktikat e rregullta të transportimit të pakove diplomatike.
Pakot me pasaportat shqiptare u zhbllokua pas verifikimit dhe dërgesa i është dorëzuar përfaqësuesve diplomatikë të Konsullatës së Janinës. Gjatë transportimit të tyre në një nga ndalesat e bëra për në Ambasadën tonë, pikërisht në rrugët e Athinës, automjeti me targa diplomatike u sulmua. Ministria e Brendshme në bashkëpunim me kompaninë ALEAT, kanë marrë masat për nxjerrjen jashtë përdorimi dhe shpalljen e pavlefshme të këtyre pasaportave, si dhe angazhimin për të përshpejtuar procedurat e riprodhimit dhe zëvendësimin e tyre.
Por ky episod që tregon dhe seriozitetin e shtetit shqiptar, të bën të mendosh dhe më tej: Si mund të realizohet dhe numërohet vërtet vota e emigrantëve, që kjo qeveri kërkon të bëjë?
Gjatë vitit 2018, ministri pa portofol Pandeli Majko, që merret me çështjet e diasporës, i ka bërë thirrje liderëve politikë për të gjetur dakordësine e tyre për votën e emigrantëve. Kjo ministri krijoji dhe një manual për regjistrimin në zgjedhje të shqiptarëve që jetojnë jashtë atdheut dhe u tha se në fund të vitit 2018 do të përfundonte procesi i regjistrimit.
Regjistrimi i emigrantëve sipas qeverisë mund të bëhej në tre mënyra. Dy prej tyre janë kërkesa me postë apo postë elektronike në një strukturë të posaçme që do të krijohet në KQZ.
Mënyra e tretë e regjistrimit do të jetë paraqitja e emigrantit në selitë diplomatike të Shqipërisë.
Ndërkohë, për votimin e emigrantëve në këtë dokument janë parashikuar dy mënyra, votimi i drejtpërdrejtë dhe ai me postë. Votim i drejtpërdrejtë do të bëhet në qendra të posaçme të ngritura jashtë Shqipërisë, ku procesi do të bëhet njësoj si brenda vendit. Ndërsa votimi me postë, do të bëhet duke marrë fletën e votimit nga interneti apo me shërbim postar dhe procesi i dërgimit të votës për në Shqipëri do të bëhet me një shërbim special poste. Ky i fundit do të ketë edhe kosto, e cila sipas këtij dokumenti llogaritet të kushtojë deri në 25 dollarë.
Transporti i materialeve diplomatike
Sipas Konventës së Vjenës, e cila përcakton qartë se si bëhet transporti i materialeve diplomatike, dy janë rrugët e transportit të tyre: përmes pakove diplomatike me avion si kargo ajrore, ose me rrugë tokësore me mjet me targa diplomatike CD dhe të shoqëruar nga një korrier diplomatik. Gjithmonë pakoja diplomatike ka firmën e një kutie të stampuar, me elementë sigurie dhe tregues dhe duhet të ketë letër shoqëruese. /G.F Opinion.al
