Pika e vlimit ka arritur dhe të gjitha pakënaqësitë shpërthejnë në revolucion. Kështu mendon ish-kryeministri Sali Berisha. Sipas tij “në 1991 vërtetë kishte një përqindje të madhe të popullatës të pakënaqur, por një pjesë e madhe ishte e indoktrinuar. Sot janë dhjetëra mijëra, që kanë votuar Edi Ramën që kanë dalë në shesh. Dilni socialistë, përzini Edi Ramën, ai ju ka dhënë llokma unë e di, por më mirë villni ato llokma, dhe largoni njeriun më të rrezikshëm pas Enver Hoxhës”.
E për të treguar pse ka këtë argument, ai ka përmendur sondazhin e bërë mbrëmjen e së enjtes në Opinion.
Sali Berisha: U pa mbrëmë një sondazh në “Opinion”, më vjen keq që marr atributet që nuk më takojnë, por ishte shumë interesant. Ishte më tronditësi, pyeste “a jeni për marrëveshje apo jo”. 72% e shqiptarëve nuk ishin për marrëveshje, sepse janë për qërimin e Edi Ramës. Mos harroni se 67% e atyre që votuan një natë më parë, në 11 mijë votues, ishin për djegien e mandateve. Jemi në kushtet e grushtit të shtetit, jemi në kufijtë e grushtit të shtetit. Edi Rama ka shkatërruar Gjykatën Kushtetuese, ai tregon se nuk njeh ligjet e vendit.
