Kompania Amerikane “Standard and Poor’s” e ka vlerësuar ecurinë ekonomike të Shqipërisë në nivelin B+ duke vlerësuar financa me perspektivë të qëndrueshme. Në raportin për Shqipërinë, agjencia thekson se vendi ynë në aspektin e mbledhjes së taksave, ka performuar më mirë se shtetet fqinje të së njëjtës kategori në rajon.
Ndërsa parshikon një rritje ekonomike me 3.7% për vitet e ardhshme, raporti vlerëson se borxhi publik i Shqipërisë është ulur me 5 pikë përqindje në tre vitet e fundit duke zbritur në nivelin 67.9 për qind e prodhimit kombëtar i mbështetur nga rritja ekonomike dhe ulja e huamarrjes nga qeveria. Sipas Standard and Poor’s nëse kjo tendencë do të vazhdojë, vlerësimi për borxhin publik të Shqipërisë mund të rritet në një notë më të lartë.
Sipas Standard and Poor’s koncesionet përbëjnë një risk domethënës për financat e shtetit dhe detyrimet që ato mund të krijojnë për buxhetin është e pamundur të vlerësohen saktësisht.
Ndërsa në lidhje me zhvillimet politike, raporti paralajmëron se zëvendësimi i gjysmës së ministrave në kabinetin qeveritar mund të çojë përkohësisht në ngadalësimin e reformave, por ka pak gjasa që të ndryshojë angazhimin e qeverisë për të vazhduar me uljen e borxhit publik.
Pak ditë më parë, edhe FMN u shpreh i se Shqipëria do të ruajë rritjen ekonomike dhe të njëjtin nivel të investimeve të huaja, duke vënë theksin tek nevoja për uljen e borxhit publik brenda objektivave të parashikuara dhe shlyerjen e detyrimeve të prapambetura.
