Kreu i PD, Lulzim Basha thotë se kryeministri Edi Rama dhe kreu i Bashkise se Tiranes Erion Veliaj firmosën për të zhvendosur shtratin e Lanës dhe për të prishur shtëpitë e mbi 200 familjeve tek Unaza e Re. Sipas tij do pastrojnë 60 milion euro të krimit me anë të pallateve të Edmond Bego, i akuzuar për trafik droge.
Basha ka publikuar edhe videon në Twitter, ku shihet sipas tij zhvendosja e shtratit të Lanës për t’i hapur rrugë këtij projekti.
“Rama dhe Veliaj firmosën për të zhvendosur shtratin e Lanës dhe për të prishur shtëpitë e mbi 200 familjeve! Këtë e bënë vetëm që t’i hapin rrugë projektit të mikut të tyre trafikant droge, ku do të pastrohen 60 milion euro të krimit. Ndaj ata nuk e duan Vetingun në politikë!”, shkruan ai.
Akuzat, Basha i përforcoi pasdite në protesten e banorëve të Astirit. Ai tha se do dalin fakte të reja edhe për firmën e Arben Ahmetajt.
“I bëj thirrje kryeredaktorëve të medias së shtruar dhe medias vizive të mos thonë sipas pretendimeve por të nxjerrin dokumentin sepse është detyrë e medias ta kishte bërë këtë investigim. E ka bërë opozita. Të nxjerrin planin urbanistik të Tiranës të nënshkruar nga Edi Rama dhe Erion Veliaj ku tregohet qartë gjëja më e pamendueshme, më absurd që nga koha e Romës së Lashtë se si i pari i vendit dhe i pari i qytetit zhvendosin Lumin, e zvendosin shtratin e Lumit për të prishur 200 shtëpi vetëm e vetëm që ti mos i preket prona ku ndërton ortaku i Taulant Ballës me firmën e Erion Veliajt, Edi Ramës dhe nesër siç do të dalë me fakte nga selia e PD, edhe me firmën e Ahmetajt”, deklaroi Basha.
Rama dhe Veliaj firmosën për të zhvendosur shtratin e Lanës dhe për të prishur shtëpitë e mbi 200 familjeve! Këtë e bënë vetëm që ti hapin rrugë projektit të mikut të tyre trafikant droge, ku do të pastrohen 60 milion euro të krimit. Ndaj ata nuk e duan Vetingun në politikë! pic.twitter.com/PR2U11hHgE
— Lulzim Basha (@lulzimbasha_al) December 23, 2018
