Në një kohë kur banorët e ‘Astirit’ vijojnë protestën e tyre duke bllokuar rrugën në shenjë kundërshtie për shembjen e banesave pas projektit për Unazën e Re, Drejtori i ARRSH, Afrim Qendro ka dalë në një deklaratë për mediat.
Qendro i bëri thirrje banorëve që të paraqiten pranë ARRSH me dokumente e pronave të tyre. Po ashtu ai hodhi poshtë akuzat e opozitës, në lidhje me faktin se projekti në fjalë është i jashtëligjshëm.
Sipas Qendros, për projektin janë ndjekur të gjitha procedurat, ndërsa sqaroi të gjitha hapat dhe vendimet që u morën, para se të niste shembja e objekteve në këtë zonë.
“U bëj thirrje banorëve të dorëzojnë të gjithë dokumentet që të nxjerrim VKM për të bërë të mundur shpronësimin. Ata që janë me legalizim, të bashkëpunojnë me ALUIZNI-n dhe me Bashkinë e Tiranës. Meqë kemi pasur disa akuza nga eksponentë të opozitës dhe jo vetëm, dua të shpjegoj disa gjëra. Dua të shpjegoj se projekti i segmentit të Unazës i ka ndjekur të gjitha hapat ligjor të duhur. Kemi një kërkesë zyrtare nga bashkia, nga ana tjetër miratimin e fondit nga Ministria e Transportit, më pas urdhrin e drejtorit të ARRSH dhe më pas Këshillin Teknik. Ne i jemi drejtuar 3 kompanive për bashkëpunim. Për bashkëpunim janë ndjekur të gjitha kontratat, pagesat që ka bërë kompania, taksat dhe tatimet që e detyron ligji. Në bashkëpunim me Bashkinë e Tiranës, kemi miratuar projekt-idenë dhe e kemi çuar në Institutin e Ndërtimeve. Të gjitha fazat ligjore i kemi bërë më së miri. Ky projekt është komfort standardeve. Segmenti ka marrë lejen nga Këshilli Kombëtar Arkeologjik, vendimin për ndikimin në mjedis në datë 12/11/2018. Po ashtu kemi marrë vendimin nga Këshilli i Restaurimit dhe vendimin për miratimin e lejes së zhvillimit nga Këshilli Kombëtar i Territorit’, tha Qendro.
