Zëvendësministri i Brendshëm, Sandër Lleshi, të cilit Kryeministri i ka dhënë kompetenca për të drejtuar Ministrinë e Brendshme, duket se ka ndërmarrë që në tre ditët e para disa urdhra që kanë çuditur opinionin publik.
Pas urdhrit që asnjë punonjës të mos rrijë në lokal gjatë orarit zyrtar, një tjetër ka tërhequr vëmendjen e punonjësve të rendit.
Punonjës policie mbi peshë ose bark derra siç shkruhet në urdhrin e Lleshit, nuk duhet të vendosen për të kryer shërbimin në vende të dukshme.
Fjala e përdorur për të cilësuar punonjësit mbi peshë është fyerje ta, por duket se kjo nuk i ka bërë përshtypje zëvendësministrit Lleshi.
Nuk dihet nëse ai vetë e ka parë këtë urdhër që mban firmën e zëvendësdrejtorit për Sigurinë Publike, Dhimitraq Ziu, dhe që është me etiketime të tilla duhet thënë aspak të denja për atë se çfarë duhet të përmbajë një shkresë zyrtare.
Por ajo që bie në sy është se Lleshi duket të jetë i shqetësuar si fillim më shumë për estetikën e policëve se sa për punën dhe disiplinën e tyre.
Pas ngjarjes në zonën e Bllokut, në urdhëresën e policisë është përcaktuar që kjo zonë të izolohet në kuptimin që veç shërbimeve të rendit, aty do të ketë dhe shërbime civile për krimet.
Një tjetër masë që vendoset në fund të listës së detyrave, është edhe evidentimi i punonjësve badygardë që shërbejnë në lokale, qofshin ata ushtarakë, policë apo pjesë të RENEA-s dhe FNSH-së. Do të shtohet gjithashtu dhe kontrolli i mjeteve të blinduara, madje do të ketë dhe bllokim të tyre./opinion.al
