Banorë dhe biznese u mblodhën të hënën pasdite tek Unaza e Re për të protestuar kundër vendimit të qeverisë për zgjerimin e rrugës dhe shembjen e një sërë objektesh.
Banorët edhe kësaj radhe bllokuan rrugën kryesore për disa minuta, pasi zëri i tyre nuk po dëgjohet ndërsa projekti ka nisur të zbatohet pa asnjë lloj konsultimi paraprak.
Banorët thanë se përpara disa ditësh u kanë shkuar punonjës të ARRSH (Autoriteti Rrugor) dhe iu kanë thënë se brenda 10 ditësh duhet të lironi banesat pasi do të nisen shembjet.
Të revoltuar ata shprehen se projekti ka ndryshuar duke bërë që përpos autostradës nga Pallati me Shigjeta tek Dogana, të ndërtohet edhe një rrugë dytësore paralele. Ata thanë se janë 300 objekte që janë njoftuar se do të shemben.
Kujtojmë se Unaza e Re është një rrugë e njohur tregtare ku prej 3 dekadash zhvillojnë veprimtarinë biznese në fushën e ndërtimit e të hidrosanitareve.
