Lavdrim Tufa është vendosur në pranga një natë më parë pasi ka kanosur një biznesmen për të paguar plot 90 mijë euro. Lavdrim Tufa nuk është një emër i panjohur për autoritetet e drejtësisë por edhe për opinionin publik.
Ai është shpallur fajtor për vrasjen e Fatmir Ramës (Miri i Xhikës) ish-pronari i “Katodromit”, ngjarje e ndodhur në vitin 2003. Ndërsa në mars 2015, Gjykata e Tiranës ka liruar me kusht Lavdërim Tufën, i dënuar për vrasjen e Fatmir Ramës, teksa i kishin mbetur edhe 1 vit e 8 burg. Në vendimin e 2015, gjykata kishte lënë si kusht që Lavdrim Tufa të mos kryente asnjë veper penale për 4 vite.
Pse u arrestua Lavdrim Tufa, 3 vite e gjysëm pasi kishte dalë nga burgu?
Policia e Tiranës përmes një njoftimi për mediat bëri të ditur sot (27 Shtator) se Specialistët për Hetimin e Krimeve të Rënda arrestuan në flagrancë shtetasin Lavdrim Tufa, 37 vjeç, banues në Tiranë, i dënuar më parë për veprën penale “Vrasja”.
“Ky shtetas, i ka kërkuar shumën prej 90 000 euro duke e kanosur administratorit të një firme private, me pretendimin se ky i fundit kishte detyrime ndaj shtetasit italian P. E., 50 vjeç”, bëri të ditur policia.
Gjatë kontrollit të ushtruar në banesën e Lavdrim Tufës është gjetur një antiplumb.
Po kështu në gjendje të lirë do të hetohet për moskallëzim krimi, F. Sh., 37 vjeç, banues në Tiranë, i cili ka patur dijeni për rastin dhe nuk ka kallëzuar pranë shërbimeve të Policisë. Po kështu janë shpallur në kërkim, P. E., 50 vjeç, banues në Itali dhe A. G., 49 vjeç, banues në Durrës.
Kronologjia e gjyqeve për vrasjen e Mirit të Xhikës
Në vitin 2006, Gjykata e Krimeve të Rënda e deklaroi fajtor Tufën dhe e ka dënuar me burgim të përjetshëm.
Në vitin 2007, Apeli i Krimeve të Rënda vendosi ta lërë në fuqi këtë vendim.
Në vitin 2009, Gjykata e Lartë prishi vendimin dhe e delegoi çështjen sërish në Apelin e Krimeve të Rënda.
Në vitin 2009, Apeli i Krimeve të Rënda vendosi të prishë vendimin e burgut të përjetshëm dhe dërgimin e çështjes në Gjykatën e Rrethit Tiranë. Prokuroria i bëri rekurs këtij vendimi, por Gjykata e Lartë në shtator 2009 vendosi të mos e pranojë kërkesën.
Në 2009, çështja i kaloi në kompetencë Gjykatës së Tiranës, e cila e dënoi me 20 vjet burg.
Në 2015, gjykata e Fierit vendosi ta lirojë Lavdrim Tufën, kur i kishte mbetur edhe 1 vit e 8 muaj nga dënimi.
