Rreth 40 emigrantë të anijes “Diciotti” janë zhdukur në Itali. Ata janë larguar qendra “Rocca di Papa” përpara se të niseshin drejt dioqezave mikpritëse, ndërsa të tjerë kanë humbur gjurmët me të mbërritur në qendrat e “Caritas”-it.
Ministri i Brendshëm, njëherësh zv/kryeministër Matteo Salvini nuk ka ngurruar të bëjë ironinë e radhës: “Po, a nuk i kisha rrëmbyer unë?!”, shkruan ai.
“Ishin kaq të dëshpëruar – theksojnë nënsekretarët e Ministrisë së Brendshme, Stefano Candiani dhe Nicola Molteni, – saqë kanë preferuar të heqin dorë nga ushqimi dhe akomodimi i garantuar për të shkuar kushedi se ku. Kjo është prova e disatë se, kush zbarkon në Itali jo gjithmonë ia ka mbathur nga uria dhe nga lufta, pavarësisht gënjeshtrave të së majtës dhe atyre që i përdorin emigrantët për të bërë biznes”.
“Asnjë prej këtyre personave nuk dëshiron të qëndrojë në Itali, kjo dihet – shpjegon drejtori i “Caritas”-it italian, don Francesco Soddu. – E përpara një situate mirëbesimi, herët a vonë kushdo do të kishte zgjedhur të largohej vullnetarisht”, pikërisht sepse struktura që i mirëpret nuk e ka për detyrim t’i mbajë. “Ka qenë një largim vullnetar, jo një arratisje. Largohen nga një situatë ‘paraburgimi’ dhe nuk është rasti i parë. Askush nuk dëshiron të qëndrojë në Itali”.
Rreth 100 emigrantë nga Eritrea u zhvendosën në qendër javën e kaluar pas një përplasjeje midis ministrit të brendshëm Matteo Salvini dhe BE-së. Aktualisht po zhvendosen nëpër dioqeza në të gjithë Italinë, të cilët kanë shprehur gatishmërinë për t’i marrë ato. Kisha katolike në Itali ra dakord të marrë 100 refugjatë, ndërsa Irlanda dhe Shqipëria thanë se do të merrnin nga 20 secila.
/Burimi: ANSA
/Në shqip: Opinion.al
