Lulzim Basha nga foltorja e Parlamentit ngriti një sërë pikëpyetjes për çështjen “Xhafaj”. Fjalimi i tij nuk u dëgjua deri në fund, pasi Gramoz Ruçi i ndërpreu fjalën.
Pasi deputetët e PD rrethuan foltoren, kreu i Kuvendit ndërpreu seancën dy herë. Sakaq anëtarët e qeverisë dhe deputetët e mazhorancës u larguan, ndërsa Basha e vijoi fjalën e tij vetëm me transmetim në facebook, dhe përmes tij edhe në media. Lideri demokrat i ka drejtuar disa pyetje Edi Ramës dhe Fatmir Xhafës.
Fjala e Lulzim Bashës në parlament:
Ku është Agron Xhafaj?
Çfarë dënimi po vuan?
A po e vuan dënimin?
Në cilin burg ndodhet?
Përse nuk foli me zë direkt në televizion apo në telefon?
Përse e hoqën menjëherë nga Shqipëria?
Fatmir Xhafa dhe Agron Xhafaj, funksionojnë si kokat e një familje mafioze, që kanë ofruar të gjithë infrastrukturën shtetërore, së pari që i vëllai të vazhdojë të jetë, koka e krimit në të gjithë Shqipërinë dhe së dyti, të largohet i qetë jashtë Shqipërisë.
A ka biseduar vetë Fatmir Xhafaj me prokurorët e çështjes së të vëllait?
A i ka çuar fjalë veglave politike të Edi Ramës dhe Fatmir Xhafës, Arta Markut dhe Donika Prelës?
A u ka bërë presion të zbatojnë urdhërat e tij për të mos zbatuar ligjin, i cili detyron prokurorinë të kërkojë ndalimin e një shtetasi të dyshuar për trafik droge.
Përse policia dhe prokuroria nuk kërkuan menjëherë bllokimin e pasaportës dhe ndalimin e daljes jashtë vendit të Agron Geron Xhafajt.
Kush e njoftoi policinë, kush e njoftoi Edi Ramën?
Kush e njoftoi Fatmir Xhafën për identitetin e dëshmitarit X, menjëherë pas publikimit të videopërgjimit nga Partia Demokratike?
Natyrisht, këto janë pyetje vetëm retorike, përgjigjet sot, i di dhe i njeh çdo shqiptar.
Zonja dhe zotërinj,
Vëllezër dhe motra,
Sot shteti ka rënë.
Familja mafioze Xhafaj me mbështetjen direkte të Edi Ramës ka shkelur dhe dhkel çdo minutë ligjet dhe Kushtetutën e vendit për të mbrojtur Agron Xhafajn, për të mbrojtur Fatmir Xhafajn, shkelet në mes të ditës ligji antimafia.
Ligji antimafia, është një ligj i miratuar në vitin 2010 me një arsye të vetme, për t’i dhënë garanci të plota Bashkimit Europian se Shqipëria e asaj kohe do të kishte jo vetëm vullnetin por edhe kornizën ligjore për të goditur ashpërsisht krimin dhe pasuritë e krimit.
Në çdo sistem normal dhe juridik, barra e provës është tek akuzuesi.
Por për të luftuar mafian, shteti italian futi në forcë, Ligjin Antimafia që është një ndër ligjet më të suksesshme në luftën kundër krimit të organizuar.
Pak vende në Europë e kanë, por shumë vende në Europë duan ta adoptojnë.
Ne e adoptuam në vitin 2010.
Çfarë thotë Ligji Antimafia?
“Nëse dikush dyshohet, ka indicie se është pjestar i krimit të organizuar, apo se merret me trafik droge, pasuritë e këtij personi, pasuritë e familjarëve të këtij personi verifikohen, sekuestrohen dhe nqse nuk justifikohen nga aktiviteti ekonomik, konfiskohen pa gjyq”.
Ky është Ligji Antimafia dhe ka për qëllim, të shkatërrojë çdo motiv të krimit të organizuar. Sepse, nqse
ky ligj zbatohet, asnjë kriminel, asnjë anëtar bande, asnjë trafikant, nuk i gëzon dot frutet e krimit. Ato konfiskohen pa gjyq.
Së dyti, Ligji Antimafia ka për qëllim t’i heqë krimit të organizuar mjetet financiare me të cilat mund të vazhdojë, të rrisë dhe të thellojë perandorinë kriminale.
Ligji Antimafia nuk mbulon vetëm pasuritë e personit të dyshuar për aktivitet kriminal.
