Festivali më i madh europian Eurovizioni 2018 mund të konsiderohet pa frikë këtë vit si festivali i shqiptarëve, për numrin e pjesëmarrësve dhe rezultateve të kënaqshme të arritura prej tyre.
Tre këngëtarët shqiptarë që ndonëse përfaqësonin tre shtete të ndryshme arritën rezultate mjaft të kënaqshme. Pas Izraelit që arriti të zërë vendin e parë, e dyta u rendit shqiptarja Eleni Foureira që përfaqësonte Qipron.
Shqipëria i dha 10 pikë Qipros, ndërsa 12 pikët maksimale i dha për Italinë, që përfaqësohej nga këngëtari shqiptar Ermal Meta.
Por mediat greke duket se janë të pakënaqura. Shtypi grek, në unison kritikon Shqipërinë që nuk i dha 12 pikë të plota Eleni Foureiras, që mund të kishin ndikuar në fitoren e saj. Edhe pse ato 2 pikë, nuk do ta ngjisnin në vendin e parë.
“Eleni Foureira ishte aq afër burimit, por nuk arriti të pinte ujë…për shkak se ia mori Neta nga Izraeli. Por ajo që bëri përshtypje dhe la shije të hidhur tek përfaqësuesja e Qipros është atdheu i saj, Shqipëria, që nuk i dha 12 pikë. Gjërat mund të kishin ndryshuar nëse Eleni do të kishte marrë disa pikë më shumë nga disa vende, veçanërisht nga Shqipëria”, shkruan e përditshmja greke “Protothema”.
Në të njëjtën linjë janë edhe mediat e tjera të vendit fqinj. Eleni Foureria, këngëtarja me origjinë shqiptare, jeton prej vitesh në Greqi ku ka zhvilluar karrierën e saj. Kësaj radhe ajo përfaqësoi Qipron duke zënë vendin e dytë.
Ndërkohë, Shqipëria i dha pikë të plota Italisë së Ermal Metës që u rendit në vendin e pestë, kurse nga ana tjetër vet Italia i dha 0 pikë Shqipërisë që përfaqësohej nga Eugent Bushpepa, i cili zuri vendin e 11-të, ndërsa Qipro dha për ne 6 pikë./opinion.al
