Kryetari i partisë ‘Zgjidhja’, Koço Kokëdhima, është shprehur të hënën se kryeministri Edi Rama ishte në dijeni të personave të inkriminuar që qeveria socialiste bashkëpunonte.
Kokëdhima tha se qeveria socialiste më në krye Edi Ramën e vendosi të gjithë shtetin në dorë të makinërisë së krimit.
Ai tha se fillimisht një praktikë e tillë u nis nga Sali Berisha dhe vazhdoi nga Edi Rama.
“Ky është një shtet mafioz që e përdor krimin dhe nuk e lufton krimin. Këtë rrugë nisi Sali Berisha dhe këtë rrugë bitisi Edi Rama”,- tha Kokëdhima.
Kreu i ‘Zgjidhjas’ foli edhe për letrën e dërguar ambasadorit SHBA-së, Donald Lu, duke nënkuptuar se letra ka lidhje me deklaratën e pak ditëve më parë, kur ambasadori Lu, gjatë një takimi të shoqërisë civile, përmendi edhe emrin e kreut të “Zgjidhja”, mes ish-zyrtarëve dhe ish-deputetëve që u larguan nga detyra si rezultat i funksionimit të ligjit të dekriminalizimit dhe punës së gazetarëve kurajozë.
Kreu i ‘Zgjidhjës’ theksoi se nuk është gjykuar dhe nuk ka qenë pjesë e ndonjë hetimi, pasi nuk mund të jetë pjesë e korrupsionit, pasi papajtueshmëria e mandatit nuk është krim.
Ai deklaroi se ata gjykatës të korruptuar në bashkëpunim me Edi Ramën dhe Sali Berishën, kontribuan në heqjen e mandatit e të tij.
