Mediat greke kanë pasqyruar gjerësisht mesazhin e presidentit Ilir Meta lidhur me negociatat për kufirin detar. Disa të përditshme në vendin fqinj theksojnë se vendimi i Metës për të mos nënshkruar dekretin që autorizon qeverinë e Tiranës për të vazhduar negociatat, minon procesin e zgjidhjes së disa çështjeve me rëndësi. Ndërsa, sipas tyre, bllokon dhe rrugën e Shqipërisë për anëtarësim në BE.
“Proto Thema” shkruan se Presidenti Meta refuzoi kërkesën e minstrit të Jashtëm për të hyrë në fazën finale të negociatave, pasi vlerësoi se kërkesa është e paqartë.
“Presidenti shqiptar iu vë flakën marrëdhënieve shqiptaro-greke”, shkruan “Enikos.gr” dhe “To Pondiki”.
Lajmi është publikuar pothuajse në të gjitha portalet e vendit, ku me një gjuhë kritike, mediet greke bëjnë kujdes që të kursejnë sulmet e drejtpërdrejta ndaj Presidentit Meta.
Kjo pasi, siç shkruajnë mediat, Meta është i pranueshëm nga të gjithë në Greqi, për shkak të toneve të tij të ulëta dhe bashkuese gjatë krizave të viteve të fundit në marrëdhëniet dypalëshe.
Ndërkohë, mediat akuzojnë Metën se më ketë qëndrim ka për qëllim të luajë lojëra të brendshme-mercenare dhe partiake.
