Është mbledhur tek hotel Adriatik në Durrës Asambleja e FSHF nga ku do të zgjidhet edhe Presidenti i ri i këtij organizmi sportiv. Ka masa të shtuara sigurie, siç shihet edhe në foto.
Asambleja është hapur nga kreu aktual Armand Duka, i cili tha se sot merren vendime për fatet e futbollit shqiptar.
“Duhet të fitojë futbolli. Të gjithë bashkë mund ta çojmë përpara progresin e deritanishëm. Kam bindjen e palëkundur që kjo asamble do t’i japë një shtysë akoma më të madhe ambicieve tona. Sot merren vendime për fatet në vijim të futbollit shqiptar”, u shpreh Duka.
Armand Duka, presidenti aktual i FSHF-së, rikandidon përballë deputetit të Partisë Socialiste, Bashkim Fino, dhe ish-arbitri, Shpëtim Halo.
Ndërkohë, konkurenti më i fortë i Dukës, Bashkim Fino ka shfaqur pakënaqësi për protokollin, pasi dy kandidatet (ai dhe Hala) u janë caktuar vendet nga fundi i sallës! Në shenjë mospajtimi ulet në fund fare së bashku me Sulejman Starovën! Fino shprehet se të tre kandidatet duhet të ishin në pozicion të barabartë dhe jo Duka të qendrojë në krye! Sipas tij është mungesë respekti.
Presidenti i ri zgjidhet me 2/3-at e votave, e në rast balotazhi, më pas do të mjaftojë shumica e thjeshtë (50%+1) për të shpallur presidentin.
Dy organizmat më të mëdha të futbollit europian dhe botëror kanë sjellë përfaqësuesit e tyre pasditen e së martës, për të qenë të pranishëm në Asamblenë Zgjedhore dhe, siç thonë edhe ata vet, urojnë që të shohin një proces zgjedhor demokratik.
Ndërkohë, pas përfundimit të procesit zgjedhor për president, në Asamble do të zhvillohet votimi për 9 vendet e Komitetit Ekzekutiv, e për këto vende janë në garë 23 kandidatë.
Përplasjet e pritshme mes dy presidentëve dhe delegatëve që i mbështesin ka detyruar policinë të qëndrojë në gadishmëri për çdo të papritur nga mbledhja e Asamblesë së FSHF-së, në Hotel Adriatik në Durrës.
Grupi i gatshëm i policisë është stacionuar pranë hotelit që në orët e para të mëngjesit, ndërsa delegatët po grumbullohen për nisjen e Asamblesë.
Sot do të votojnë 66 delegatë, ku përfshihen edhe përfaqësuesit e 12 shoqatave që mbështesin Dukën.
