Kryeprokurorja Arta Marku po shkarkon me dorë të hekurt të gjithë të besuarit e Adriatik Llallës në pozicione drejtuese. Kështu është rasti i Durrësit, ku ka larguar Agron Gjanën, i cili ishte i emëruar në këtë detyrë. Burimet thanë se Gjanës i ishte kërkuar largimi me dorëheqje nga kjo detyrë, por pas refuzimit të tij, kryeprokurorja Marku vendosi jo vetëm largimin, por caktimin e tij të përkohësisht si prokuror në Prokurorinë e Pukës. Në vend të tij, kryeprokurorja komandoi znj. Donika Prela, aktualisht prokurore pranë kësaj prokurorie. Drejtuesja e re e Prokurorisë së Durrësit rezulton e kallëzuar penalisht bashkë me një gjyqtare të këtij qyteti për akuzat e shpërdorimit të detyrës dhe “zhdukja ose humbja e shkresave nga fashikulli”, shkruan sot gazeta “Mapo”.
Po ashtu, prokurorja e re e Durrësit ka përfaqësuar akuzën në rastin e arrestimit dhe kontrollit të automjetit të shtetasit Ledion Ruçi, ngjarje e ndodhur në vitin 2012 duke i kërkuar gjykatës lirimin e djalit të deputetit Gramoz Ruçi dhe shpalljen e paligjshme të kontrollit të automjetit ku udhëtonte i dyshuari. Të gjithë drejtuesit e lëvizur nga detyra përgjatë këtyre ditëve pritet të kundërshtojnë vendimin e kryeprokurores Marku në Gjykatën Administrative, si të pabazuar në ligj.
