Një gomone që erdhi dje për tu ngarkuar me drogë në Vlorë u kap sot në Malin e Zi pas një ndjekje më shumë se 24 orë në det të hapur. Janë angazhuar një sërë njësish policore të Shqipërisë, Italisë e Malit të Zi dhe më në fund janë kanë dalë të kapin gomonen bosh. Policia e Shtetit ka bërë një listë të gjatë të njësive dhe mjeteve që u përdorën në operacion por nuk thuhet se çfarë u gjet në gomone dhe a u sekuestrua lënda narkotike që po trafikohej? Gjithashtu në njoftim nuk flitet për shqiptarë të përfshirë në trafik por vetëm për skafistët malazez.
Më poshtë njoftimi i plotë i Policisë së Shtetit shqiptar
Kapet gomonia që ishte në ndekje që prej ditës së djeshme nga Policia Kufitare, Delta Forcë, Guardia di Finanza, QNOD, Forcat e Armatosura dhe Policia e Kufirit dhe Forcat Speciale Malazeze.
Rreth orës 17.30, Policia malazeze e mbështetur nga Forcat e Speciale të Marinës Ushtarake dhe Roja Bregdetare Malazeze ka bërë të mundur bllokimin e gomones me 3 shtetas në bord, konkretisht shtetasit: E.K dhe M.S nga Mali i Zi, si dhe R.M, nga Serbia por banues të tre në Bar-Podgorica.
Gjithashtu, ka bërë të mundur edhe bllokimin e një tjetër gomoneje e cila tentoi të ndihmonte gomonën që ndiqej që prej ditës se djeshme nga policitë e tre vendeve me koordinimin edhe të një avioni të Guardia di Finanza nën ombrellën e Frontex.
Në bordin e gomones së dytë janë kapur dy shtetas edhe këta shtetas malazeze.
Një ditë më parë, Delta Forcë, Policia Kufitare dhe D.V.P.Vlorë gjatë kontrollit nga deti dhe toka në zonën e Karaburunit nisur nga informacionet e marra në rrugë operative se mund të ishte fshehur lëndë narkotike me qëllim trafikimi, rreth orës 13.50, konstatuan mjetin lundrues që lëvizte me shpejtësi në drejtim të Mezo-kanalit, Sazan.
Menjëherë në ndjekje të mjetit lundrues u vunë 3 mjete lundruese të Policisë Kufitare dhe të Delta Forcë.
Eshtë kërkuar gjithashtu ndihma e anijës “Oriku” dhe e Helikopterit të FA-së si dhe GdF Durrës e Vlorë si dhe homologët italianë e malazeze.
Në ndjekje ishte dhe një helikopter “COUGAR” i FA shqiptare.
Gomonia tentoi të fshihej në ujrat territoriale të Malit të Zi ku u pikas e u ndalua sot.
Po vijon puna për sqarimin e plotë të kësaj ngjarje.
Duhet theksuar se në asnjë moment forcat policore të tre vendeve nuk e kanë ndërprerë ndjekjen dhe kontrollin për bllokimin e gomones.
Falë një pune profesionale dhe koordinimit e bashkëpunimi të shkëlqyer nga Zyrat ndërlidhese të Policise shqiptare në Bari, Itali dhe Policisë italiane e Guardia di Finanza në Pulia e NUFROM në Shqipëri, Policisë së Kufirit të Malit të Zi e forcave të Marinës ushtarake dhe Rojës Bregdetare malazeze është bërë e mundur të ndalohen dy gomonet dhe personat e përfshirë.
*Foto e gomones së sekuestruar nga policia
/Opinion.al
