Një ngjarje e rëndë ka ndodhur në aksin Levan-Fier, kur një taksist është lënë në mes të rrugës, ndërsa makina e tij u grabit nga persona të paidentifikuar.
Taksisti Bujar Elezi ishte nisur nga Durrësi të shtunën në mbrëmje ku kishte marr dy pasagjerë për t’i çuar drejt Vlorës. Por në aksin Levan-Fier, dy personat që kishin hipur si pasagjerë në mjetin e tij e kanë dhunuar dhe e kanë mbyllur në bagazh taksistin. Ata kanë vijuar rrugën drejt Vlorës dhe midis fshatrave të Kërkovës dhe Bunavisë kanë ndaluar duke e lënë taksisitin në mes të rrugës, ndërsa kanë marr makinën e tij.
Taksisti 48-vjeçar është dërguar në spital ku ka marrë mjekimin e nevojshëm dhe ndodhet jashtë rrezikut për jetën.
Në njoftimin e policisë thuhet se prej mbrëmjes së djeshme janë organizuar shërbimet Policore dhe janë ngritur pika të shumta kontrolli me qëllim kapjen e autorëve. Për dokumentimin e plotë të ngjarjes po kryhen hetime të përbashkëta mes Drejtorisë së Policisë Vlorë, Fier dhe Durrës. Gjithashtu po bashkëpunohet për kapjen e autorëve edhe me Policinë e Gjirokastrës, Delvinës dhe Sarandës.
