Nga 1 janari 2018 do të ketë 909 drejtues makinash që do të paguajnë taksën për mjetet luksoze, ndërsa familjet do të paguajnë më shumë taksa për apartamentet.
Me formulën e re biznesi do të jetë më i favorizuar në taksën e ndërtesës, pasi ai do të paguajë më pak. Ndryshimet për taksat e makinave luksoze dhe apartamentet qeveria i sjell në paketën fiskale të vitit të ardhshëm. “Panorama” boton shembujt e paketës fiskale me kategoritë e makinave që preken nga taksa e luksit dhe sa do të paguajnë qytetarët për apartamentet dhe biznesi me taksën e re.
MAKINAT
Nga 1 janari i 2018-s, të gjitha makinat me kapacitet 6+1, nëse janë me cilindrat mbi 3 mijë cm3 apo me çmim mbi 5 milionë lekë, do të paguajnë taksën e luksit. Sipas të dhënave të Drejtorisë së Shërbimit të Transportit Rrugor, nga taksa e re do të preken 909 makina me kapacitet 6+1. Pronarët e këtyre makinave do të paguajnë 21 mijë lekë në vit taksën e përvitshme dhe 70 mijë lekë taksën e regjistrimit.
Aktualisht, kjo taksë paguhet për makinat me kapacitet 4+1, të cilat plotësojnë një nga kriteret që të kenë cilindrat të barabartë ose më të madh se 3 mijë cm3 dhe me çmim më shumë se 5 milionë lekë. Me ndryshimet e ligjit, taksa e luksit do të paguhet për makinat me kapacitet 6+1, të cilat plotësojnë të paktën një nga kriteret ose të kenë cilindrat mbi 3 mijë cm3, ose vlera e çmimit të makinës të jetë mbi 5 milionë lekë.
Në relacionin e paketës fiskale shpjegohet se ndryshimi i kriterit për kapacitetin e vendeve u ndryshua pas konstatimit që shumë drejtues makinash modifikonin kapacitetin e vendeve të mjetit për t’iu shmangur pagimit të taksës.
APARTAMENTET
Pas 1 janarit të vitit të ardhshëm, më shumë taksë do të paguhet për shtëpitë edhe për ndërtesat e bizneset. Paketa fiskale përcakton që taksa e re e shtëpive të jetë 0.05 për qind e vlerës që ka shtëpia sipas çmimeve të tregut. Relacioni i paketës fiskale përcakton qartë se për llogaritjen e taksës së re do të përdoren çmimet fiskale të miratuara nga qeveria.
Kjo do të sjellë që një familje në Tiranë, që banon në zonën e “Porcelanit”, në apartament me sipërfaqe 100 metra katrorë, që përkon me zonën kadastrale 3/1 dhe çmimi fiskal është 77,000 lekë për metër katror, llogaritet që vlera e apartamentit sipas tregut të jetë 7,7 milionë lekë. Sipas përllogaritjeve të taksës me formulën e re, kjo familje do të paguajë 3,850 lekë në vit.
Për një familje që banon në Durrës, në një apartament me sipërfaqe 100 m2 dhe çmimi fiskal është 67,500, vlera e shtëpisë sipas tregut llogaritet 6,750,000 lekë. Taksa që do të paguajë kjo familje do të jetë 3,375 lekë në vit.
BIZNESI
Me paketën e re fiskale biznesi do të paguajë më pak për taksën e ndërtesës. Edhe për biznesin aktualisht taksa e ndërtesës është fikse 400 lekë/m2. Me formulën e re do të jetë 0,15 për qind e vlerës së ndërtesës. Për ta konkretizuar, nëse një biznes posedon një ambient me sipërfaqe 50 metra katrorë, ai aktualisht paguan 20,000 lekë taksë. Me formulën e re, nëse ndërtesa ka vlerë 5 milionë lekë me taksën 0,15 për qind, biznesi do të paguajë 7,500 lekë.
SHEMBUJT
SA DO TË PAGUAJNË MAKINAT E LUKSIT
Nga 1 janari i vitit të ardhshëm, të gjitha makinat me kapacitet vendesh 6+1, në rast se janë mbi 3 mijë cilindrat apo me vlerë çmimi mbi 5 milionë lekë, do të paguajnë 21 mijë lekë në vit taksën e makinës së luksit. Përveç kësaj, kur makina regjistrohet për herë të parë, do të paguajnë 70 mijë lekë taksën e regjistrimit. Aktualisht kjo taksë paguhet nga pronarët e makinave 4+1 nëse plotësohet kriteri i cilindratit apo çmimit. Por qeveria ndryshoi kriterin e kapaciteteve të vendeve për shkak të abuzimeve që bënin shoferët me modifikimin e sediljeve.
SA DO TË PAGUHET PËR SHTËPITË
Për shtëpitë qytetarët do të paguajnë më shumë lekë me taksën e re të pronës. Për ta konkretizuar sa do të paguhet, gazeta risjell edhe një herë shembullin e llogaritjes së taksës me formulën e re që do të aplikohet nga 1 janari. Nëse një familje banon në zonën e “Porcelanit”, në apartament me sipërfaqe 100 metra katrorë, që përkon me zonën kadastrale 3/1 dhe çmimi fiskal është 77,000 lekë për metër katror, llogaritet që vlera e apartamentit sipas tregut të jetë 7,7 milionë lekë. Sipas përllogaritjeve të taksës me formulën e re, kjo familje do të paguajë 3,850 lekë në vit.
SA DO TË PAGUHET PËR BIZNESIN
Për biznesin aktualisht taksa e ndërtesës është fikse 400 lekë/m2. Me formulën e re do të jetë 0,15 për qind e vlerës së ndërtesës. Për ta konkretizuar me një shembull, nëse një biznes posedon një ambient me sipërfaqe 50 metra katrorë me çmim 5 milionë lekë, ai aktualisht paguan 20,000 lekë taksë. Me formulën e re, nëse ndërtesa ka vlerë 5 milionë lekë, me taksën 0,15 për qind biznesi do të paguajë 7,500 lekë. Edhe për biznesin taksa e ndërtesës do të llogaritet si përqindje mbi vlerën e ndërtesës sipas çmimit të tregut.
DORINA AZO/PANORAMA
