Është grabitur banesa e ministrit të Energjisë dhe Infrastrukturës, Damian Gjiknuri. Bëhet fjalë për shtëpinë e vjetër, aty ku është rritur ministri dhe ku sot jeton nëna e tij, Lirie Gjiknuri, ndërsa vetë ministri tashmë banon në zonën e Bllokut.
Lajmi u dha që në mëngjes nga gazeta partiake Rilindja Demokratike, ndërsa policia e konfirmoi ngjarjen pas 5 orësh.
“Gjatë natës, në rrugën “Maliq Muço”, persona të paidentifikuar, kanë vjedhur banesën e shtetases L. Gj. 67 vjeçe banuese në Tiranë, ku kanë marrë shumë lekësh”, thuhet në njoftimin e policisë.
Sipas Rilindjes Demokratike: “Grabitja ka ndodhur dje në mesditë por në shtëpi nuk ka patur njeri. Nga aty kanë dalë thasë me para, por policia e mban ngjarjen të fshehtë”.
Duke dashur të sheshojë komentet për milionat, nëna e ministrit, znj. Lirie Gjiknuri u ka thënë gazetarëve: “Nuk kam as miliona dhe asgjë tjetër, më grabitën 3 milionë lekë të vjetra të mbledhura nga pensioni im”. Por sa kaq burimet nga policia thanë se më herët se bëhet fjalë për 30 milionë lekë të grabitura. Deri tani janë shoqëruar disa të dyshuar që po merren në pyetje, thanë më tej burimet nga policia e Tiranës. /Opinion.al
*Apartamenti i Gjiknurit, pas Ministrisë së Drejtësisë
