Edi Rama fitoi timonin që kërkoi gjatë fushatës elektorale, për të qeverisur i vetëm vendin, pa bezdinë e partive të vogla.
Partia Socialiste ka siguruar 51 % të votave, ose 74 mandate, kur janë numëruar pak më shumë se gjysma e votave.
Ndërsa Partia Demokratike bashkë me aleatët e saj, ka 43 mandate, ose 29.5 % te votave, duke humbur 7 vende në parlament, nga zgjedhjet e vitit 2013.
Me këtë rezultat, më të dobëtin e të djathtës në historinë e zgjedhjeve parlamentare pluraliste në Shqipëri, Lulzim Basha e çoi Partinë Demokratike në humnere.
Një rezultat, që vjen pas një fushate kaotike dhe listës së deputeteve krejtësisht personale të Lulzim Bashes, i cili largoi nga fusha e betejës pothuajse të gjithë boshtin e Partise Demokratike.
Ajo çfarë shihet nga numërimi i deritanishëm i votave, është se Edi Rama mori një rezultat që tejkaloi edhe pritshmërie e tij për 71 mandate. Krahasuar me zgjedhjet e vitit 2013 Partia Socialiste është rritur me 9 mandate.
Dhe Rama nuk do të ketë me nevojën e koalicioneve për të formuar qeverinë. Lëvizja Socialiste për Integrim, që e bazoi fushatën në një betejë të egër me kryeministrin, ka marrë 15.3 përqind të votave, ose 19 mandate. Jane 3 me shume se zgjedhjet e vitit 2009.
Socialistët kanë thelluar diferencën jo vetëm në qarqe si Fieri, Vlora, Berati, e Gjirokastra të njohura si zona tradicionalisht të majta, por edhe në Tiranë, Durrës, e Korçë.
Partia Demokratike ka ruajtur epërsinë vetëm në qarkun e Kukësit, por me 1 mandat më pak se në 2013, ndërsa rezulton humbëse në pjesën dërrmuese të qarqeve.
Disfatën me të thellë demokratët e kanë pësuar në Qarkun e Elbasanit ku në krahasim me vitin 2013 kanë marrë 3 mandate më pak.
Po ashtu PD është goditur edhe në bastionin e saj në Shkodër, ku la jashtë listës së deputetëve ish-nënkryetaren e saj, Jozefina Topalli.
Në këtë qark socialistët kryesojnë me 5 mandate kundrejt 4 të Partisë Demokratike. Një mandat më pak se në zgjedhjet e kaluara Partia Demokratike ka marrë edhe në Qarkun e Lezhës, atë të Dibrës, Kukësit, e Durrësit.
Me rezultatet e deritanishme parti e katërt renditet PDIU mes 3 dhe 4 mandateve, ndërsa Libra e Ben Blushit shpreson të arrijë 1 mandat në Tiranë.
Numërimi i votave ka pasur ndërprerje në disa qendra, kryesisht për shkak të lodhjes së komisionerëve, por pritet të përfundojë brenda ditës së sotme.
Tv Klan
