Para pak javësh,“Vogue Russia” solli një seri fotosh ekskluzive me Irina Shayk, të punuara nga fotografët e njohur Luigi & Iango. Së fundmi, ky projekt i Irinës është ripërpunuar në tërësi nga fotografi ynë Geljant Kaleci dhe velina e “Top Channel“ Anisa Mukaj, si pjesë e BOOK-ut të saj të kërkuar nga një agjenci italiane e modës.
nga Albatros Rexhaj
“Artisti i keq kopjon, ndërkaq artisti i merr vjedh dhe madje nuk e fsheh fare këtë gjë!”
Jo rastësisht, këtë shënim, e fillova duke parafrazuar thënien e famshme të Pikasos, pasi që Geljant Kaleci dhe Anisa Mukaj nuk kanë kopjuar punën e Luigi & Iango dhe Irina Shayk, por në tërësi e kanë “vjedhur” atë. Me fjalën “vjedhje” nënkuptoj pikërisht atë që ka pasur në mendje Pikaso, sepse vetëm një artist i mirë është në gjendje ta marrë konceptin e dikujt tjetër dhe mbi atë koncept të ndërtojë diçka të veten.
Duke ripërpunuar në tërësi konceptin e Luigi & Iango, padyshim një koncept pothuajse i përsosur, si në ide ashtu edhe në teknikë, Geljanti ia ka dal që të ruajë në tërësi subjektivitetin personal të Anisës. Anisa nuk vjen si një Irinë Shayk, që padyshim se do të dilte një produkt komik, por, e parë në syrin e Geljantit, ajo vjen si një Anisa me ambicie dhe plan për veten. Nuk kam asnjë dilemë se këtë detaj, shumë të domosdoshëm, ka mundur ta nxjerrë veç një fotograf si Geljanti, i njohur për fiksimin e tij pas mikro detajeve.
Ajo që më intrigon shumë është fakti se Anisa Mukaj nuk është modele. Ajo është velina gazmore e Fiks Fare, një balerinë televizive me një stil shumë interesante, por gjithsesi një bukuroshe me nuanca të theksuara të bukurisë mediterane. E gjatë 178 cm dhe me një peshë ideale prej 58 kg, e kuruar dhe e kujdesshme për imazhin e saj, Anisa Mukaj fare lehtë mund të jetë gjetja e radhës në botën shqiptare të modës. Pse jo edhe pak freski në eterin tonë me imazhe të konsumuara.
