Numri II i PS, Gramoz Ruçi ka reaguar për qendrimin e LSI-së se zgjedhjet pa opozitën do të ishin një farsë. Duke folur nga Fieri, zona e tij elektorale, ai u shpreh se kush kërkon shtyrjen e zgjedhjeve, kërkon një Shqipëri pa institucione. Ruçi nuk e ka artikuluar qartë por e ka lënë të nënkuptuar se më 18 Qershor PS-LSI hyjnë në zgjedhje si parti më vete dhe jo si koalicion.
“Ne si forcë politike jemi të hapur që në 18 Qershor nuk ka maxhorancë dhe opozitë, por ka palë”, u shpreh ai.
Deklarata e Ruçit
Ne do të paraqesim ofertën tonë në 18 Qershor. Kemi edhe një detyrim tjetër moral, politik, ligjor dhe kushtetues që të mos lejojmë që në këtë vend të ketë kriza dhe destabilitet. Jemi të gatshëm dhe në çdo kohë që çdo kërkesë që kanë palët e tjera, të interesuara për datën 18 Qershor, për përmirësime, korrigjime të infrastrukturës së zgjedhjeve, të kodit Zgjedhor, jemi të gatshëm ti mbështesim.
Ne si forcë politike jemi të hapur që në 18 Qershor nuk ka maxhorancë dhe opozitë, por ka palë. Çdo propozim që kanë palët e tjera, nëse ato i çertifikojnë arbitrat, OSBE dhe ODIHR, ne i votojmë. Do ketë apo nuk do ketë zgjedhje, e përcakton kushtetuta. Zgjedhjet shtyhen vetëm kur ka situatë lufte, thotë kushtetuta. Çdo alternativë tjetër që vë në diskutim datën 18 Qershor do të thotë një Shqipëri e destabilizuar dhe një Shqipëri në krizë institucionesh.
