Kryeministri Edi Rama artikuloi të hënën (13 Mars) në mbledhjen e Kryesisë e më pas edhe në publik, në emisionin “Top Story” se çadra e PD në Bulevard nxitet dhe mbështetet nga qarqe të huaja, jo dashamirëse të Shqipërisë. Po atë ditë Basha kishte takuar ambasadorin rus në Tiranë, Aleksandër Karpushin. Pas deklaratës së Ramës, Basha u pyet live në “Opinion” se çfarë janë këto qarqe që mbështesin protestën?
Ai tha se “këto deklarata janë përralla. Këto i thotë njeriu që deshi të bëhej diktator por që shqiptarët ja prishën ëndrrën. Unë sot kam patur një takim me ambasadorin e Rusisë në një takim publik. Është një takim në kuadrin e një kontakti normal që PD ka me gjithë përfaqësuesit e huaj në Shqipëri. Kontakte me qarqe të huaja që të diskutoj fatet e Shqipërisë PD nuk ka dhe nuk do të ketë”.
Por çfarë u diskutua në takimin Basha-Karpushin?
Ambasada ruse ka reaguar duke thënë se parimi bazë i politikës së jashtme të Rusisë është ai i mosndërhyrjes në punët e brendshme të vendeve të tjera.
Në njoftim thuhet se gjatë takimit me Bashën, Karpushin theksoi se Federata Ruse vlerëson se ekzistojnë mundësi të pashfrytëzuara për të rritur bashkëpunimin ekonomik pragmatik mes dy vendeve tona dhe shpreson se në të ardhmen të punohet për të rritur nivelin e këtij bashkëpunimi.
“Ambasadori shprehu besimin se një impuls të fortë shkëmbimeve dypaleshe ekonomike do t’i japë takimi në muajin prill në Tiranë i bashkëkryetarëve të Komisionit Ndërqeveritar Rusi-Shqipëri për Tregtinë, Bashkëpunimin Ekonomik dhe Tekniko-Shkencor, si dhe sesioni i ardhshëm i këtij Komisioni qe pritet të mbahet ne vjeshtë, kur të formohet qeveria e re shqiptare”, thuhet në njoftim.
Nga ana tjetër, ambasada ruse thotë se Basha e Karpushin kanë pikëpamje të përbashkëta se disa çështje nuk duhet të pengojnë përpjekjet për të eksploruar fusha të bashkëpunimit reciprok mes Shqipërisë dhe Rusisë.
