Kryetari i bashkisë së Ankarasë, Melih Gokçek, e ka përsëritur sërish deklaratën e tij tejet interesante, se është kleriku Fethullah Gylen, i cili jeton në Pensilvani të Shteteve të Bashkuara, që po i shkakton tërmetet dhe tronditjet sizmike që kanë ndodhur kohët e fundit në Turqi, me qëllimin për të dëmtuar edhe më ekonominë turke. Këtë deklaratë ai e ka lëshuar menjëherë pas dy tërmeteve që kanë ndodhur njëri pas tjetrit, në qytetin e Çanakalesë, gjatë së hënës dhe të martës së shkuar.
Mirëpo, ajo që i ka çuditur më tepër shtypin ndërkombëtar dhe lexuesit e këtij lajmi në mbarë botën është se kjo është një deklaratë, të cilën kryebashkiaku i kryeqytetit të Turqisë nuk është hera e parë që e bën. “Për mua pak rëndësi ka se ç’do të thonë të tjerët, por unë e shoh situatën si shumë të rëndë dhe duhen bërë menjëherë kontrolle të njëpasnjëshme, sepse kjo mund të jetë një përpjekje për të shkaktuar tërmete artificiale në vend”, është shprehur ai. Vetëm pak javë pas tentativës për grusht-shtetit, në muajin korrik, ai pati bërë gjithashtu një deklaratë të ngjashme, ku shprehej se lëvizja Gylen do të përpiqet ta dëmtojë Turqinë duke shkaktuar tërmete nëpërmjet një linje sizmike të krijuar enkas për këtë “qëllim të kobshëm”.
