Këngëtari Vedat Ademi po përflitet se është larguar nga Shqipëria, duke nisur jetë të re në SHBA me familjen, bashkëshorten Dorela dhe djalin e tyre, Jonart. Realizimi i dy klipeve në distancë i ka përforcuar dyshimet, por artisti rrëfen të vërtetën e tij në këtë intervistë për gazetën “Panorama”, bashkë me projektet në muzikë.
“Bën ftohtë” dhe “Më mirë me zemër”, dy klipe që i ke publikuar së fundi gjatë qëndrimit në SHBA. Ke shkuar posaçërisht për xhirime?
“Bën ftohtë” është klipi që u realizua në vitin 2015, dhe është xhiruar në Kanada (Toronto). Kurse “Më mirë me zemër” është xhiruar në New York. Sigurisht, për shkak të angazhimeve personale unë shfrytëzova dhe mundësinë për të xhiruar këto dy klipe këtej, ka dhe këngë të tjera ndërmjet këtyre dy klipeve, që unë i kam realizuar në Shqipëri.
Pse ke vendosur të bësh këngë që i dedikohen dashurisë e larg komercit?
Mbizotërojnë këngët me temë dashurie, por ka edhe me tema sociale. Në të gjitha këngët përzgjedh emocione të forta, siç është tema e dashurisë. Në të tilla këngë jam vetvetja e nuk pretendoj të jem pjesë e komercit, por herë pas here më pëlqen të eksploroj edhe me këngë ritmike.
Flitet se je larguar nga Shqipëria dhe je vendosur përgjithmonë në SHBA. E vërtetë është?
Kam dëgjuar të flitet për këtë pjesë. Nuk jam larguar përgjithmonë, ashtu siç nuk do të largohem nga muzika. Pavarësisht ku ndodhem fizikisht, publikut tim nuk do t’i mungoj asnjëherë. Angazhimet e mia në SHBA janë familjare dhe profesionale. Jam duke punuar në disa projekte në të njëjtën kohë.
Synon të depërtosh në tregun muzikor amerikan?
Tregu amerikan është një ëndërr e të gjithëve. Ndoshta po ka talent, e arrin djali im.
Si është të realizosh produksione muzikore nga SHBA për tregun shqiptar. Ai realitet aty çfarë ka plus apo minus këtij realitetit tonë shqiptar?
Unë jam i njëjti, s’ka rëndësi ku bëhen xhirimet. Këngët janë për publikun tim dhe jo për tregun shqiptar. Nëse quhet, për “tregun” është fakti që është në gjuhën shqipe. Nuk mund të flas për minuse e pluse, sigurisht këndvështrimet e dy vendeve janë të ndryshme dhe ofrojnë hapësira të ndryshme.
Cilat janë këngët me të cilat po punon tani, dhe ke plan të bësh ndonjë bashkëpunim tjetër në distancë si ai me Vullnet Ibrahimin?
Kam disa projekte që po punoj. Nuk më pëlqen të flas para kohe për detajet, gjithsesi mendoj që do të jenë të veçanta. Kurse sa u përket bashkëpunimeve mendoj të bëj pushim pak nga pjesa e dueteve.
