Manjola Bregasi
Viti akademik ka nisur sot me 4 mijë kuota të lira në universitet publike duke i vënë studentët e rinj përballë një fenomeni të panjohur deri tani. Ditët e tensionuara të maturantëve protestues të mbetur pa shkollë, tashmë ua kanë lënë vendin auditorëve të zbrasur, fryt i një reforme të shumëdiskutuar.
I frikshëm si Orakulli i Delfit, apo largpamës si një intelektual? Më kujtohet në emsionin “Opinion” të datës 13 Shtator, deklarata e fortë e pedagogut Arlind Qorri: “Në tetor, rrezikon qe në Universitetet Shqiptare të ketë auditore të mbetur bosh dhe studentë që nuk mund të regjistrohen në to”. Kjo si pasojë e reformës dhe skemes.
Disa e besuan, disa e kundërshtuan dhe të tjerë pritën ta vërtetojnë mëngjesin e 20 tetorit.
Çfarë ndodhi me të rinjtë shqiptarë? Mos ndoshta ata befas vendosën të heqin dorë nga shkolla dhe të ndjekin këshillat e Kryeministrit për arsim profesional? Më duket pak e çuditshme, që ndryshe nga çdo vit, kur maturantët luftonin për të ndjekur studimet e larta, këtë vit ata të jenë neglizhentë e të mos regjistrohen në universitete. Sigurisht që nuk është kjo arsyeja. Le të na japë Ministrja Nikolla një arsye tjetër, të besueshme, por të vërtetë dhe të mos justifikohet me rritjen e kuotave.
Le t’i japë ajo përgjigje pyetjes, se si është e mundur, që vetëm dy ditë para nisjes së universitetit në Fakultetin e Mjekësisë numëroheshin 28 vende të lira, ndërkohë që stomatologjia kishte 67 dhe farmacia 79?
Nuk po flas për filologjinë me 317 vende, shkencat e natyrës me 973 vende, shkencat sociale me 402 vende dhe ekonomikun me 776 kuota të lira.
Si është e mundur që degët e preferuara të shumë vajzave dhe djemve që qanin në protestë se nuk i kishin arritur, sot të mbeten bosh?!
Sipas Kryeministrit këto degë i fituan studentët e ekselencës. Po tani kush do të regjistrohet në këto degë? Do mbeten bosh, apo do regjistrohen ata që nuk janë dhe aq ekselentë, por që për fat të mirë u vjen radha, sepse shokët e tyre me mesatare 9.8, të trembur mos mbeten pa shkollë u regjistruan në universitetet private?
Kush fitoi nga kjo reformë? Nëse privatët jo, atëherë le të na japin shifrat e të regjistruave në këtë vit akademik e të na lënë mundësinë t’i krahasojmë me vitet e shkuara, për të parë që kjo ishte një reformë e drejtë.
A munden sot Rama dhe Nikolla së bashku, t’u garantojnë atyre maturantëve me mesatare mbi 9, që shokët e tyre me mesatare më të ulët nuk do regjistrohen në degët që ata i lanë, sepse nga frika shkruan tek privatët?
A ishte vërtet kjo meritokracia e përfolur e reformës, apo dështimi i turpshëm i saj?
Viti akademik filloi dhe 4 mijë vende në universitetet shqiptare janë bosh. Ajo çfarë Edi Rama e trumbetoi si suksesin e reformës së tij, duket se qe dështimi i saj. Për fat të keq edhe pas fillimit zyrtar të universitetit do të regjistrohen studentë të rinj, të cilët do ta nisin me vonesë vitin akademik, ndryshe nga sa Rama kishte premtuar, që reforma e tij do të sillte. Afati i fundit i regjistrimeve (tashme te shtyra) është 27 tetori, por pyetja është: nëse edhe pas kësaj date do të ketë vende bosh, kush do t’i plotësojë ato?
Video/Me poshte, deklarata e pedagogut Arlind Qorri ne emisionin “Opinion”
