Ditën e diel kombëtarja u mund me rezultatin 2-0 ndaj Spanjës. Në stadiumin “Loro Boriçi” nuk u shfaq ajo skuadër që ishte kualifikuar në Kampionatin Evropian, por një tjetër e frikësuar, dhe me shumë gabim. Këto gabim i kushtuan dy gola, por edhe paraqitje të keqe në statistikat e ndeshjes.
Statistikat treguan gjithashtu shifra të frikshme për kuqezinjtë, por ato rëndohen edhe më shumë kur krahasohen me statistikat që modestët e Lihtenshtejnit patën në përballjen me Spanjën në muajin shtator. Lihtenshtejni u mposht me rezultatin 8 me 0 nga Spanja, por loja e tyre në disa drejtime ishte më lartë se ajo e Shqipërisë. 22.6% ishte mbajtja e topit për Shqipërinë në ndeshjen me iberikët, ndërsa Lihtenshtejni përballë të njëjtit kundërshtar e ka mbajtur topin gati 5% më shumë se kuqezinjtë.
Djemtë e Gianni de Biasit realizuan 287 pasime, ndërsa skuadra e principatës 269 të tilla, por saktësia e tyre ka qenë e njëjtë, 66.6% për Shqipërinë dhe 66.2% për Lihtenshtejnin. Skuadra jonë nuk arriti të siguronte asnjë korne mbrëmë, por skuadra e vogël e drejtuar nga Rene Pauritsch ka gjuajtur të paktën njëherë nga kornia në zonën spanjolle. Shqipëria shkaktoi 16 faulle ndaj Spanjës, ndërsa Lihtenshtejni 10. Ne luajtëm kundër Spanjës në shtëpi, ndërsa Lihtenshtejnii jashtë saj.
