Derbi i Italisë është fituar nga Interi. Të zotët e shtëpisë në “Xhuzepe Meaca” kanë arritur të thyejnë kampionët në fuqi të Juventusit, dhe për më tepër diçka të tillë e kanë bërë me përmbysje rezultati. Në fund të takimit zikaltërit mbetën me 10 lojtarë pas largimit me të kuq të Banegës në minutën e 90, por arritën ta ruanin avantazhin 2-1 deri në vërshëllimën e fundit të Taljaventos. Kjo fitore i rikthen buzëqeshjen trajnerit De Bur, pozicioni i të cilit u vu në dyshim pas humbjes në mesjavë në Ligën e Europës.
Në pjesën e parë Interi ishte më kërkues se Juventus por 45 minutat e para u ndanë pa prekje të rrjetës. Në këtë pjesë, më saktësisht në minutën e 25-të, trajneri Alegri u detyrua të bënte një zëvendësim në mbrojtje duke larguar të dëmtuarin Benatia dhe në vend të tij aktivizoi Barzalin. Në pjesën e dytë Interi luajti edhe më mirë, por të parët që kaluan në avantazh ishin juventunët me anë të Lishtajnerit në minutën e 66. Avatazhi i tyre nuk zgjati më shumë se 2 minuta pasi në të 68-n kapiteni i zikaltërve, Ikardi, ktheu barazpeshën. 10 minuta më vonë, në minutën e 78, i futuri në lojë në pjesën e dytë, Ivan Perisiç, gjeti golin e përmbysjes së madhe duke kaluar në epërsi vendasit.
Zëvendësimet e Alegrit i cili aktivizoi Higuainin para se të përmbysej rezultati dhe Pjacën pas përmbysjes nuk dhanë efekt, ndërsa tensioni për të ruajtur rezultatin te Interi u rrit dhe kjo gjë u bë e dukshme nga dy kartonat e verdhë të njëpasnjëshëm Banegës në minutat 84 dhe 90. Në fund me të verdhë u ndëshkua edhe Handanoviç për vonesë të lojës. Pas këtij takimi, Inter ngjitet në kuotën e 7 pikëve dhe kap provizorisht vendin e 6 në renditje, ndërsa Juventus mbetet 9 pikë dhe bie përkohësisht në vend të dytë duke lënë Napolin të marrë kryesimin i vetëm./panoramaspot
