Presidenti i Republikës, Bujar Nishani i ka uruar të gjithë besimtarëve myslimanë Festën e shenjtë të Fiter Bajramit.
Presidenti Nishani theksoi se kjo ditë e shenjtë na shërben të gjithëve për të larguar nga vetja urrejtjen, ndasitë dhe përçarjet e panevojshme duke na afruar edhe më tepër me njëri-tjetrin.
Ai, bëri me dije se kjo ditë e madhe na ka shtuar dashurinë për bashkëatdhetarët, si dhe duke na ripërtërirë virtytet, besimin dhe paqtimin.
“Pas ditëve fort të mundimshme të agjërimit, por njëkohësisht të sprovës e të konsolidimit të besimit që keni kaluar gjatë Ramazanit, Festa e madhërishme e Fiter Bajramit kurorëzon përpjekjet e frytshme të atyre që besojnë në mësimet e shenjta dhe fuqinë e Krijuesit, të atyre që pasi kanë përshkuar udhëtimin shpirtëror njëmujor, ia kanë dalë mbanë të jenë bërë më të virtytshëm, më të mëshirshëm dhe më zemërgjerë”, nënvizon Presidenti Nishani.
Kreu i shtetit, tha se kjo festë e madhe na mbush të gjithëve me pak më shumë shpresë, me shumë më tepër vullnet për të dhënë e për t’iu gjendur më afër të sëmurëve, fatkeqëve, të vobektëve si dhe atyre të cilët jeta nuk i ka trajtuar edhe me aq mëshirë apo begati.
“Prandaj në këtë ditë të madhërishme, sidomos pas gjithë asaj sakrifice, ju dëshiroj shëndet, begati, ndriçim të shpirtit dhe kthjellim të mendjes, zemërgjerësi dhe sa më tepër respekt për më të pafatët e për ata që janë ndryshe”, shkruan Nishani.
Presidenti ka uruar nga zemra të gjithë besimtarët myslimanë dhe jo myslimanë, të cilët në respekt të tjetrit dhe të mirën e vetës, mbajnë Ramazanin dhe respektojnë Bajramin.
“Gëzuar dhe për shumë vjet Fiter Bajramin!”, mbyll urimin e tij Presidenti i Republikës, Bujar Nishani.
