“Që të jetë i pazëvendësueshëm, një njeri duhet të jetë gjithmonë ndryshe.”
Coco Chanel
Manjola Bregasi
Më jepni një çantë “Chanel” dhe me të do postoj gjithë fotot e mundshme në Instagram. Kështu do të kem mundësinë t’ua tregoj të gjithëve, miqve dhe armiqve, se cilës sërë i përkas. Ndaj, mua më duhet patjetër një çantë e tillë. Çfarë do mendojnë koleget e zyrës, nëse nuk arrij të jem në të njëjtin nivel me to? Që unë nuk e kam mundësinë ta blej një çantë “Chanel”? Që unë nuk di të jem interesante dhe vanitoze? Po kjo është e patolerueshme për një vajzë si unë dhe shumë e rëndësishme në këto ditë të mbushura me Instagram dhe Facebook. Pikërisht aty, nga çanta që unë zgjedh të mbaj apo nga këpucët që vesh, unë prezantohem në shoqëri. Imagjinoni çfarë do të mendonte fatorinoja i urbanit me të cilin udhëtoj çdo ditë për në punë? Që unë nuk jam në gjendje të blej një çantë firme?
Me çdo kusht duhet ta kem një tillë. Edhe sikur të më duhet ta privoj veten nga gjithçka tjetër e së përditshmes, duhet ta kem atë çantë, njëlloj si të asaj deputetes që e kishte postuar në instagram. Po tek e fundit, rrogë ajo e rrogë unë. Nuk po blej koleksionin e ri dhe ja ku i kursej ca lekë,
Çfarë? Ah po. Është edhe varianti i imitimeve. Mirë që të shkoi në mend. Meqë u bë punë imitimesh kjo histori, po shoh se më thanë që ka ca variante interesante cilësore, që edhe nuk kushtojnë shumë edhe nuk dallohen. Se mos kjo e zyrës që tha se ja bleu i dashuri në Itali e ka origjinale? Nuk besoj që ai i me rrogën prej emigranti t’i blejë çantë firmato. E keni parë si ekspozohet? Si rastësisht çanta është në çdo foto. Ja këtë po pres edhe unë, ta blej atë timen dhe pastaj të jem e qetë dhe e bindur, që i përkas një statusi të lartë.
E di çfarë? Ja edhe ca ditë, kam ditëlindjen. Po lexoj sot në një nga këto portalet, që kohët e fundit gocat VIP, kanë filluar e po i “gdhenin” çantat në torta. A nuk ma sillni një tortë të tillë dhe të mbledh mendjen?
Më besoni vajza, por sot statusi është shumë i rëndësishëm dhe më mirë se një çantë me ato dy “C” rrumbullake, asgjë nuk ta dhuron një status në shoqëri.
Kam arsye të besoj në këtë ide. Sepse nuk gjej motiv tjetër, për të cilin një politikane duhet të postojë veshjet e saj firmato në rrjetet sociale, nuk gjej motiv tjetër për të cilin një personazh i njohur i show bizit do të shqetësohej kaq shumë, që në fotot e hedhura në rrjetet sociale, ashtu si rastësisht të dalë edhe marka e këpucëve apo çantës. E pas tyre, plot vajza të reja, që përpiqen t’u ngjajnë. Jetojmë në kohën e rrjeteve sociale, ku nuk na duhet të lodhemi për të ndërtuar një përmbajtje, sepse mjafton imazhi, që është në gjendje të shesë gjithçka, mjafton një çantë firme dhe ti bëhesh i famshëm, ose thjesht konfirmon statusin, qe nuk e ke. Nuk po lodhem të kërkoj arsyet që na çojnë drejt zgjedhjeve të tilla, se tek e fundit, po mësohemi tashmë me idenë e dukjes pa përmbajtje, që nuk është më thjesht tendencë, por stil jetese. Shijojeni, sa kohë ka njerëz që e pëlqejnë!
