TIRANE- Në përgjigje të fjalës së Ben Blushit se Shqipëria nuk duhet të tregohet raciste ndaj emigrantëve që mund të zgjedhin Shqipërinë si rrugë kalimi drejt BE-së, ministri Tahiri tha se Shqipëri nuk ka vendosur të ndërtojë mure në kufi.
Ministri i Brendshëm u shpreh se “një zgjidhje e qëndrueshme për një problem të tillë kaq të madh nuk vjen kurrë nga vullneti unilateral i çdo vendi, qoftë kjo për të hapur apo mbyllur kufijtë. Shqipëria kurrë nuk ka diskutuar as për të ngritur mur në kufi por as për të hapur kufijtë. Kjo nuk është çështje nëse Shqipëria i hap i apo i mbyll kufijtë”.
Sipas tij kjo nuk është një çështje e një vendi nëse i hap apo i mbyll kufijtë sepse asnjë zgjidhje nuk vjen në mënyrë të qëndrueshme në rast se nuk zgjidhet në mënyrë të përbashkët nga të gjitha vendet. “Skenari kur, ajo që quhet rruga e Ballkanit apo më keq rruga e Adriatikut, që realizohet shpesh edhe këto kohë, do ishte skenar fatkeq në rast se nuk do kishte bashkëpunim dhe solidaritet nga të gjitha vendet që preken nga kjo histori”, tha Tahiri në Parlament.
Tahiri për muxhahedinët
Përsa i takon çështjes së muxhahedinëve, është diskutuar shumë këto kohë lidhur me një të supozuar vendim të qeverisë shqiptare për të marrë 3000 muxhahedinë në Shqipëri. Është e pavërtetë! Nuk ka vendim për të marrë 3000 veta. Ka vendim për të vazhduar një çështje që me shumë të drejtë e adresoi qeveria e kaluar bashkë me partnerët dhe që ne e vazhdojmë me intensitet në emër të humanizmit dhe të solidaritetit ndaj atyre që janë në nevojë.
