VERONA- Artur Petushi, i konsideruar si boss-i shqiptar i drogës në Itali u arrestua në Verona. Policia sekuestroi 28 kilogramë kanabis sativa, 700 gramë kokainë, 25 mijë euro dhe 47 telefona celularë. Petushit iu vendosën prangat në zonën e Villa-Franca aty ku jetonte dhe ishte rezident prej kohësh. Ai u arrestua në një parkim dhe në makinën që drejtonte u gjet dhe sasia e drogës.
Shqiptari sipas autoriteteve italiane ushtronte aktivitetin e tij prej disa vitesh dhe ishte një ndër furnizuesit kryesore me drogë të veriut të Italisë. Atij i janë sekuestruar 6 automjete të cilat ishin të përshtatura për të trasportuar drogë.
Artur Petushi për hetuesit italianë është një trafikant me shumë lidhje dhe falë dinakërisë së tij ai vazhdonte të ishte aktiv dhe i sukseshëm në shitjen e të gjithë llojeve të drogës. Gjykata e Veronës ka caktuar masën e sigurisë, burg pa afat për trafikantin shqiptar dhe po heton për personat me të cilët Petushi bashkëpunonte në tregtimin e lëndëve narkotike.
