TIRANË-Ministri i Brendshëm, Sajmir Tahiri është takuar sot në mesditë me ambasadorët e vendeve të BE që kanë mision në Tiranë. Takimi është zhvilluar në zyrat e delegacionit të BE, tek qendra Coin dhe sipas burimeve është kërkuar prej diplomatëve.
Interesit të madh të medias që priste para zyrave të BE i është përgjigjur shkurt vetëm ministri Tahiri, ndërsa ambasadorët janë shmangur.
“Patëm mundësi të bisedonimin për një sërë çështjesh të Ministrisë së Brendshme; si lufta kundër krimit të organizuar, kundër trafikut të lëndëve narkotike, për Byronë Kombëtare të Hetimit dhe luftës ndaj parasë së pistë”, u shpreh Tahiri.
I pyetur nga gazetarët nëse mori ndonjë kritikë nga diplomatët e huaj, Tahiri tha: Mund t’i pyesni por nuk besoj.
Tahiri dhe ambasadorët e vendeve të BE-së kanë biseduar përreth 1 orë e 30 minuta. Ky takim vjen në kohën kur në çdo cep të vendit raportohen parcela të mbjella me kanabis dhe avionët me lëndë narkotike kapen njëri pas tjetrit në Itali. Gjithashtu dhe në kohën kur opozita ka shtuar dozën e akuzave ndaj Tahirit si dhe denoncimit të ish-shefit të policisë Zagani.
