Mbrëmjen e së martës, më 28 prill, emisioni “Opinion” i është kushtuar fshatit Lin të Pogradecit, një prej vendbanimeve më të hershme liqenore në Europë dhe njëkohësisht një zonë me vlera të veçanta natyrore dhe kulturore, e mbrojtur nga UNESCO si peizazh kulturor dhe ansambël arkitektonik.
Drejtuesi i emisionit Blendi Fevziu ka udhëtuar drejt zonës së Linit, duke eksploruar një prej hapësirave ku janë zbuluar gjurmët e vendbanimeve më të lashta liqenore në Europë.
Programi është ndërtuar në tri pjesë kryesore, duke u fokusuar në zbulimin arkeologjik që vërteton lashtësinë e vendbanimit dhe në procesin kërkimor që e ka dokumentuar atë.
Në pjesën e parë, erdhi në një intervistë profesori Ilirjan Gjipali, arkeologu që ka qenë pjesë e ekspeditës zvicerane që konfirmoi këtë zbulim dhe që i ka kushtuar gjithë karrierën studimit të arkeologjisë. Në këtë segment përfshihen gjithashtu intervista me Ledjan Zeqollarin, drejtor i Turizmit në Pogradec, guidën lokale Aleksandër Filipllari, si dhe të tjerë bashkëbisedues, përfshirë një peshkatar, një shitëse të zonës, kryeplakun Gafur Avdullari dhe Olsi Çekiçin, specialist i Qendrës së Rritjes së Koranit në Pogradec.
Në pjesën e dytë, emisioni “Opinion” solli një intervistë me Amanda Cicin, drejtoreshë e trashëgimisë kulturore në Korçë. Gjithashtu, Blendi Fevziu vizitoi bujtinën “House 1960”, të drejtuar nga Merita dhe Merim Sulollari, e vendosur në thellësi të fshatit Lin.
Në pjesën e tretë, emisioni “Opinion” i kushtoi vëmendje artizanes së njohur pogradecare Hava Basholli, duke sjellë një portret të punës dhe traditës së saj artizanale.
