Ukraina do t’u kërkojë aleatëve edhe 20 miliardë dollarë shtesë për të forcuar avantazhin e saj të përkohshëm ndaj Rusisë në fushën e betejës.
Një zyrtar i lartë ukrainas i mbrojtjes, që foli në kushte anonimiteti për POLITICO, tha se kërkesa do të paraqitet më 18 qershor në takimin e radhës të Grupit të Kontaktit për Mbrojtjen e Ukrainës, i njohur si formati Ramstein.
“Të gjithë e shoihin që Rusia po digjet dhe ne duam të digjet edhe më shumë, por na duhet financim për ta bërë këtë”, tha ai.
Sipas zyrtarit, aleatëve do t’u kërkohet të kontribuojnë nga 2 deri në 6 miliardë dollarë secili për të arritur objektivin prej 20 miliardë dollarësh. Mbështetja mund të vijë si ndihmë ose si kredi.
Paratë do të përdoren për mbrojtjen ajrore, blerjen e armëve përmes programit të NATO-s, dronë shtesë, municione, pajisje për luftën elektronike, kapacitete me rreze të gjatë veprimi dhe blerje direkte nga kompanitë ukrainase të mbrojtjes.
Kievi ka shtuar ndjeshëm sulmet me dronë dhe raketa muajt e fundit, duke goditur logjistikën ruse, rrjetet e transportit, rafineritë e naftës, portet dhe objekte të tjera strategjike brenda territorit rus.
Presidenti ukrainas Volodymyr Zelenskyy deklaroi të enjten se sistemet pa pilot të Ukrainës po operojnë me sukses në nivele të ndryshme, nga fronti deri te objektivat kyçe qindra kilometra brenda territorit armik.
Zyrtari ukrainas tha se ndihma nga vende si Gjermania, Norvegjia dhe Holanda ka ndihmuar në ndryshimin e dinamikës së luftës. Ai paralajmëroi se “dritarja e mundësisë po mbyllet”, duke shtuar se Rusia po përshtatet shpejt dhe mund të rikuperojë avantazhin nëse Ukraina nuk siguron mbështetjen e nevojshme në kohë.
Nga ana tjetër, zëdhënësja e Ministrisë së Jashtme ruse, Maria Zakharova, kritikoi kërkesën për fonde shtesë, duke thënë se “sa herë ndodh e njëjta histori: Kievi ka nevojë për më shumë para”. Ajo e cilësoi këtë si “shembullin më të mirë të vetëdëmtimit politik”.
