Dhjetëra mijëra njerëz dolën në protestë në Madrid të shtunën duke kërkuar dorëheqjen e kryeministrit spanjoll Pedro Sánchez, pas një serie skandalesh korrupsioni që kanë goditur qeverinë e tij. Sipas autoriteteve, të paktën shtatë policë mbetën të plagosur gjatë përplasjeve me protestuesit, ndërsa tre persona u arrestuan. Incidentet shpërthyen pasi një grup protestuesish tentoi të çante kordonin e sigurisë pranë rezidencës së Sanchez në Pallatin Moncloa.
Pamjet e transmetuara nga mediat spanjolle treguan policinë duke ndaluar persona të maskuar në rrugën që të çon drejt rezidencës së kryeministrit. Protestuesit mbanin pankarta me slogane si “Dorëheqja e mafias socialiste”, ndërsa në marshimin e quajtur “Marshi për Dinjitet” valëviteshin flamuj kombëtarë spanjollë.
Në protestë morën pjesë edhe drejtues të opozitës nga Partia Popullore dhe partia e ekstremit të djathtë Vox. Tensionet politike në Spanjë janë rritur pas njoftimit të një gjykate spanjolle se ish-kryeministri socialist José Luis Rodríguez Zapatero po hetohet për akuza që lidhen me trafik influence dhe pastrim parash. Zapatero, një aleat i afërt i Sanchez, i ka mohuar akuzat. Vetë Sanchez ishte përballur më herët me presion për dorëheqje, pasi në vitin 2024 u hap një hetim ndaj bashkëshortes së tij, Begoña Gómez. Kryeministri spanjoll i ka cilësuar hetimet si të motivuara politikisht nga grupet e ekstremit të djathtë.
Organizatorët thanë se në protestë morën pjesë rreth 80 mijë persona, ndërsa përfaqësuesi i qeverisë në Madrid e uli shifrën në rreth 40 mijë protestues.
