Pas ngërçit politik që zgjati për 8 muaj, Kuvendi i Kosovës është konstituuar, duke i hapur rrugën formimit të qeverisë së re. Deputetët e dalë nga zgjedhjet e mbajtura në shkurt votuan sot për nënkryetarin e pestë të Kuvendit, atë të pakicës serbe, duke zgjedhur Nenad Rashiç në këtë post.
Rashiç, nga partia serbe “Për Liri, Drejtësi dhe Mbijetesë, mori 71 vota pro, 9 kundër dhe 24 abstenime. Ai u mbështet nga LVV dhe Lidhja Demokratike e Kosovës, Partia Demokratike e Kosovës abstenoi, ndërsa Lista Serbe votoi kundër kandidaturës së tij.
Pasi 9 kandidatët e propozuar më herët nga Lista Serbe nuk arritën të siguronin 61 votat e nevojshme, kryetari i Kuvendit, Dimal Basha, aktivizoi mekanizmin zhbllokues të shortit, që përdoret pasi dështojnë të votëbesohen kandidatët e propozuar. Duke qenë se Rashiç ishte emër i vetëm, shorti u anulua dhe u votua direkt. Më pas, Basha deklaroi se Kuvendi konsiderohet i konstituuar.
“Konstatoj se Kuvendi zgjodhi Nenad Rashiç nënkryetar të kuvendit të Kosovës nga radhët e deputetëve të komunitetit serb. Njoftimi për formimin e grupeve parlamentare duhet t’i dërgohet kryetarit të kuvendit jo më vonë se 7 ditë nga formimi i seancës konstituive. Konstatoj se Kuvendi është i konstituuar ”, tha Basha.
Nga ana tjetër, Lista Serbe kundërshton konstituimin duke thënë se Rashiç “është zgjedhur me forcë si deputet, e tani edhe si nënkryetar.”
Për kreun e PDK-së Memli Krasniqi, i cili votoi kundër Rashiç, hapi i radhës duhet të jenë zgjedhjet e parakohshme.
“Për neve është e rëndësishme që konstituimi të jetë final për formimin e qeverisë së re. Të gjejmë mekanizëm për zgjedhje të parakohshme sa më parë, mbetet të shihet në vijim”, tha Krasniqi.
Votimi i nënkryetarit serb erdhi pas urdhrit të Gjykatës Kushtetuese se Kuvendi kishte 12 ditë kohë për zgjedhjen e tij. Ndonëse më herët, me zgjedhjen e 4 nënkryetarëve të tjerë, Basha e konsideroi Kuvendin si të konstituuar, Kushtetuesja pezulloi çdo veprim të mëtejshëm pas padisë së Listës Serbe.
Formimi i qeverisë së re
Tanimë që Kuvendi u konstituua, i hapet rruga formimit të qeverisë së re tetë muaj pas zgjedhjeve të 9 shkurtit. Presidentja Vjosa Osmani ka detyrimin ligjor që të emërojë partinë ose koalicionin fitues, në këtë rast koalicionin e udhëhequr nga Lëvizja Vetëvendosje, së bashku me Lëvizjen Guxo dhe Alternativën, si mandatar për formimin e qeverisë. Kabineti i propozuar nga ky koalicion duhet të sigurojë së paku 61 vota në Kuvendin prej 120 deputetësh, në mënyrë që të miratohet.
Me 48 vende në parlament, LVV nuk mund të arrijë këtë shumicë pa një partner tjetër në koalicion. Nëse nuk arrin të sigurojë votat e nevojshme, presidentja Osmani ka afat 10 ditë për të ftuar partitë në konsultime dhe për të caktuar një mandatar të ri, atë që ka më shumë gjasa për të formuar qeverinë.
Mandatari i ri ka në dispozicion 15 ditë për të paraqitur përbërjen e re të kabinetit qeveritar. Në rast se dështon edhe kjo përpjekje e dytë, Kushtetuta e detyron presidenten që të shpallë zgjedhje të reja, të cilat duhet të mbahen brenda 40 ditësh.
